انتخاب امیر بی بی سی اردو ڈاٹ کام، پشاور

	کاغذات منظور اور مسترد ہونے کے خلاف درخواستیں ٹربیونلز کو دینی ہونگی

قومی اسمبلی اور چاروں صوبائی اسمبلیوں میں حصہ لینے والے امیدواروں کے کاغذات منظور اور مسترد کیے جانے کے ریٹرننگ افسروں کے فیصلوں کے خلاف درخواستیں خصوصی طور پر تشکیل دیے گئے الیکشن ٹریبونلز کے پاس سات دسمبر تک جمع کرائی جا سکیں گی۔

الیکشن کمیشن آف پاکستان نے اس مقصد کے لیے نو ٹریبونلز تشکیل دیِے ہیں جن میں سے پانچ پنجاب، دو سندھ، ایک بلوچستان اور ایک سرحد و قبائلی علاقہ جات کے لیے بنائے گئے ہیں۔

متعلقہ صوبوں کی ہائی کورٹس کے ججوں پر مشتمل ان الیکشن ٹریبونلز میں دائر کی گئی درخواستوں پر فیصلے چودہ دسمبر تک کیے جائیں گے۔

ملک بھر کی طرح پشاور سمیت صوبہ سرحد کے دیگر اضلاع میں امیدواروں کے کاغذاتِ نامزدگی کی جانچ پڑتال کا مرحلہ پیر کو دن چار بجے مکمل ہوا۔

ضلع پشاور میں، جہاں قومی اسمبلی کی چار اور صوبائی اسمبلی کی گیارہ نشستوں پر مقابلہ ہونا ہے، عوامی نیشنل پارٹی، پاکستان پیپلز پارٹی اور متحدہ مجلسِ عمل کے مابین سخت مقابلہ کی توقع کی جا رہی ہے جبکہ قومی اسمبلی کی چند نشستوں پر پاکستان مسلم لیگ (ق) اور پاکستان مسلم لیگ (ن) نے بھی مضبوط امیدوار کھڑے کیے ہیں۔

قومی اسمبلی کی نشست NA-1 سے تئیس، NA-2 سے انیس، NA-3 سے بیس اور NA-4 سے پندرہ امیدوار میدان میں ہیں۔