ذوالفقار علی بی بی سی اردو ڈاٹ کام، اسلام آباد

	ترمیم کے تحت کسی وکیل کو بےضابطگی کا مرتکب پانے پر سزا دی جا سکتی ہے

نئے ترمیمی قانون کے تحت اگر کوئی شخص بار کونسل یا بار ایسو سی ایشن کی زیادتی کا شکار ہو تو وہ بار کونسل کے چیئرمین کے پاس اپیل کر سکتا ہے اور ان کا فیصلہ حتمی ہوگا۔

عہدے کے لحاظ سے بار کونسل کے چیئرمین ملک کے ایڈوکیٹ جنرل ہوتے ہیں اور اس وقت یہ عہدہ اٹارنی جنرل ملک محمد قیوم کے پاس ہے۔

پاکستان کے صدر جنرل پرویز مشرف نے یہ آرڈینیس سنیچر کی شام کو جاری کیا جس کے ذریعے اس ایکٹ میں ترمیم کی گئی ہے۔ اس ترمیمی قانون کے تحت بار ایسوسی ایشن سے کسی وکیل کی رکنیت اس وقت تک ختم نہیں کی جا سکے گی یا اسے نکالا نہیں جا سکے گا جب تک کہ اس رکن کا موقف نہ سن لیا جائے گا اور اس پر بار کونسل کے چیئرمین کی پیشگی منظوری حاصل نہ کر لی جائے۔

اس قانون کے تحت سپریم کوٹ اور ہائیکورٹ کو پیشہ وارانہ یا کسی اور بےضابطگی کا مرتکب ہونے والے وکیل کو سزا دینے کا اختیار بھی دیا گیا ہے۔ آرڈیننس میں کہا گیا ہے کہ اگر کسی شکایت پر یا دیگر ذرائع سے معلومات کی بنیاد پر سپریم کورٹ یا ہائیکورٹ کے پاس یہ اخذ کرنے کے لیے معقول وجوہات موجود ہوں کہ کوئی وکیل پیشہ وارانہ یا کسی اور بےضابطگی یا بداعمالی کا مرتکب ہوا ہے تو عدالت کو یہ اختیار ہو گا کہ وہ رکن کو صفائی کا موقع دینے کے بعد شکایت کو رد کرسکتی ہے، وکیل کی سرزنش کر سکتی ہے اور جب تک مناسب سمجھے معطل بھی کر سکتی ہے جب تک عدالت مناسب سمجھے۔ اس کے علاوہ اس کے علاوہ عدالت ایڈوکیٹ کا نام وکلا’ کے فہرست سے خارج کرسکے کرسکتی ہے۔

سپریم کورٹ بار ایوسی ایشن کے نائب صدر سخی سلطان ایڈوکیٹ نے ترمیمی قانون کو غیر آئینی قراردیتے ہوئے اس کی مذمت کی ہے۔ انہوں نے کہا کہ موجودہ حکومت نے ہنگامی حالت کی آڑ میں ملک میں مارشل لاء نافذ کیا ہے اور عبوری آئینی حکم نامہ جاری کیا جس کا مقصد عدلیہ کو اپاہج کرنا اور ججز اور وکلاء کے خلاف کارروائی کے ساتھ ساتھ میڈیا کے خلاف کارروائی کرنا تھا۔

انہوں نے کہا اب وکلاء کی آزادی سلب کرنے اور ان کو دبانے کے لیے قانون میں ترمیم کی ہے اور ساتھ ہی ساتھ ان وکلاء کو تحفظ فراہم کرنا چاہتی ہے جو بار کونسل اور بار ایسوسی ایشن کے فیصلے کے خلاف پی سی او کے تحت حلف اٹھانے والے ججز کے سامنے پیش ہو رہے ہیں۔

انہوں نے کہا کہ حکومت کو یہ غلط فہمی ہے کہ ہم اس طرح کے ہتھکنڈوں سے خوفزدہ ہو جائیں گے اور حکومت اپنے عزائم میں کبھی کامیاب نہیں ہوگی۔ انہوں نے کہا کہ’ہم آمریت کے خاتمے، آئین کی بحالی اور ایمر جنسی سے پہلی والی عدالتوں کی بحالی تک اپنی جدوجہد جاری رکھیں گے‘۔