 | | | | | | | |||||||||||||||||||||||||||||||||||
| | ||||||||||||||||||||||||||||||||||||||||
|
توہین عدالت کا فیصلہ محفوظ | ||||||||||||||||||||||||||||||||||||||||
سندھ ہائی کورٹ نے وزیراعلٰی ارباب غلام رحیم کے خلاف چیف جسٹس کی توہین کے مقدمے کا فیصلہ محفوظ کرلیا ہے اور درخواست پر سماعت اکیس نومبر تک ملتوی کردی ہے۔ عبوری آئینی حکم کے تحت حلف اٹھانے والے چیف جسٹس افضل سومرو کی سربراہی میں پانچ رکنی بنچ نے پیر کو ارباب غلام رحیم کے خلاف ریفرنس کی سماعت کی۔ ارباب غلام رحیم کے وکیل وسیم سجاد نے عدالت سے استدعا کی کہ توہین عدالت کے نوٹس واپس لیے جائیں۔ یاد رہے کہ سندہ ہائی کورٹ کے رجسٹرار نے سابق چیف جسٹس صبیح الدین احمد کے خلاف وال چاکنگ اور بینروں کے بارے میں عدالت کو رپورٹ پیش کی تھی اور وزیر اعلٰی سندھ کے اس بیان کے متعلق اخبارات میں شائع ہونے والی خبروں کے تراشے بھی پیش کیے تھے جس میں وزیراعلٰی ارباب غلام رحیم نے اس کارروائی کو عوامی رد عمل قرار دیا تھا۔ ایمرجنسی سے قبل ہائی کورٹ نے ایک درجن سے زائد رپورٹروں کو بھی نوٹس جاری کیے تھے کہ وہ ارباب غلام رحیم کے حوالے سے شائع کیے گئے بیان کے بارے میں حلفیہ بیان جمع کروائیں مگر رپورٹوں کو طلب ہی نہیں کیا گیا۔ ہائی کورٹ نے ارباب غلام رحیم کے خلاف توہینِ عدالت کی ایک دوسری درخواست کی سماعت اکیس نومبر تک ملتوی کردی ہے۔ کراچی بار ایسوسی ایشن کے صدر افتخار جاوید قاضی نے اس درخواست میں موقف اختیار کیا ہے کہ ارباب غلام رحیم نے بارہ مئی کے واقعہ پر سندھ ہائی کورٹ کی طرف سے از خود نوٹس کے بعد عوام اور میڈیا میں اس طرح سے رد عمل کا اظہار کیا ہے جو توہین عدالت کے زمرے میں آتا ہے۔ درخواست میں کہا گیا ہے کہ ارباب غلام رحیم نے جو الفاظ اور فقرے استعمال کئے ہیں ان میں ججوں کی توہین اور عدالت کے وقار کو مجروح کیا گیا ہے اور عدلیہ کو بدنام کرنے کی کوشش کی گئی ہے۔
درخواست گذار افتخار جاوید قاضی اور ان کے وکیل منیب الرحمان ایم پی او کے تحت جیل میں ہیں ۔ ارباب غلام رحیم بطور وزیر اعلٰی اپنی مدت پوری کرچکے ہیں مگر ان کے وکیل پیر کی سماعت کے موقع پر وزیراعلٰی ہاؤس کی گاڑی میں عدالت پہنچے۔ عدالت میں بارہ مئی کےواقعہ کے بارے میں از خود نوٹس کی بھی سماعت ہوئی اور دلائل کے بعد سماعت تین دسمبر تک ملتوی کردی گئی۔ اس مقدمے میں عدالت نے یہ جاننے کی کوشش کی تھی کہ 12 مئی کو کراچی میں جو کچھ ہوا وہ کیوں ہوا؟ اس کے ذمہ دار کون ہیں اور حکومت نے ان کے خلاف کیا کارروائی کی ہے؟ بارہ مئی کو سابق چیف جسٹس افتخار محمد چودھری کی کراچی آمد کے موقعہ پر شہر میں شدید ہنگامہ آرائی ہوئی تھی جس میں چالیس سے زائد افراد ہلاک ہوگئے تھے۔ دوسری جانب ہائی کورٹ نے پاکستان پیپلز پارٹی کی چئرپرسن بینظیر بھٹو کو خواتین کی مخصوص نشست پر ایم این اے قرار دینے کے بارے میں درخواست کی سماعت اکیس نومبر تک ملتوی کردی ہے۔ بینظیر بھٹو کے وکیل فاروق ایچ نائیک چٹھی پر ہونے کی وجہ سے عدالت میں حاضر نہیں ہوئے۔ ایمرجنسی کے نفاذ کے بعد عبوری آئینی حکم کے تحت حلف اٹھانے والے سندھ ہائی کورٹ کے ججوں نے پہلی مرتبہ ایک ہائی پروفائل مقدمات کی سماعت کی ہے۔ |  اسی بارے میں  ’عدالتیں غیر جانبدار نہیں رہیں‘28 May, 2007 | پاکستان اندرون سندھ تیسرے روزبھی ہڑتال21 October, 2007 | پاکستان بارہ مئی کی تحقیقات نہیں ہوں گی25 May, 2007 | پاکستان حکمران جماعت میں خلفشار23 February, 2005 | پاکستان سندھ کابینہ: نئے وزراء کی شمولیت25 June, 2004 | پاکستان وزیر اعلیٰ سندھ نے حلف لے لیا 09 June, 2004 | پاکستان سندھ حکومت کو بحران کا سامنا22 May, 2006 | پاکستان متحدہ کےخلاف ملک گیرمظاہرے13 May, 2007 | پاکستان | ||||||||||||||||||||||||||||||||||||||||
| |||||||||||||||||||||||||||||||||||||||||
| |||||||||||||||||||||||||||||||||||||||||
عدالت نے یہ جاننے کی کوشش کی تھی کہ 12 مئی کو کراچی میں جو کچھ ہوا وہ کیوں ہوا؟ اس کے ذمہ دار کون ہیں اور حکومت نے ان کے خلاف کیا کارروائی کی ہے
