نثار کھوکھر بی بی سی اردو ڈاٹ کام، سکھر

	سندھ کی اکثر قوم پرست جماعتوں نے کراچی بم دھماکوں کی مذمت کی ہے اور جاں بحق افراد کی مغفرت کےلیے غائبانہ نماز جنازہ ادا کی۔

حیدرآباد کے قریب کوٹری شہر میں مشتعل افراد نے المدینہ چوک پر وزیر اعلیٰ سندھ ارباب غلام رحیم کی تصاویر والے سائن بورڈز کو اکھاڑ پھینکا اور تصاویر پر ڈنڈے اور پتھر برسائے۔

پیپلز پارٹی کی کال پر کراچی کے بم دھماکوں میں ہلاک افراد کی اتوار کے روز حیدرآباد پریس کلب کے سامنے غائبانہ نماز جنازہ ادا کی گئی۔ پی پی پی سے وابستہ اراکین اسمبلی امیر علی شاہ، زاھد بھرگڑی ،پیر امجد شاہ جیلانی اور دوسری کارکنان نے شرکت کی۔ نماز جنازہ سے قبل پی پی حیدرآباد کے ضلعی صدر زاھد بھرگڑی کی رہائش گاہ پر قرآن خوانی کی گئی ہے۔

جبکہ بینظیر بھٹو کے آبائی شہر لاڑکانہ سمیت دادو، عمر کوٹ، نوابشاہ، ٹھٹہ اور نوشہرو فیروز میں تیسرے روز بھی شٹر بند ہڑتال کی گئی۔ مشتعل کارکنان نے ہاتھ میں ڈنڈےاور جھنڈے اٹھا رکھے تھے اور چند مقامات پر دکانداروں سے کارکنان کی جھڑپیں بھی ہوئی ہیں۔

سندھ کی اکثر قوم پرست جماعتوں نے کراچی بم دھماکوں کی مذمت کی ہے اور اپنی جماعتوں کی طرف سے جاں بحق افراد کی مغفرت کےلیے غائبانہ نماز جنازہ ادا کی۔ سندھ نیشنل فرنٹ کے سربراہ ممتاز بھٹو نے کراچی بم دھماکوں میں جاں بحق افراد کی غائبانہ نماز جنازہ لاڑکانہ میں اپنے گاؤں میں ادا کی۔

جبکہ سندھ ترقی پسند پارٹی کے سربراہ ڈاکٹر قادر مگسی کی اپیل پر حیدرآباد میں انکے پارٹی دفتر کے سامنے غائبانہ نماز جنازہ ادا کی گئی۔انہوں نے ایک تعزیتی اجتماع بھی کیا اور بم دھماکوں کی تفتیش کا مطالبہ کیا۔

عوامی تحریک کے سربراہ اور سندھ میں بینظیر بھٹو کےنقاد رسول بخش پلیجو نے اپنی جماعت کے ایک اجلاس کے بعد سپریم کورٹ سےاٹھارہ اکتوبر کے دھماکوں کا ازخود نوٹِس لینے کا مطالبہ کیا ہے۔

رسول بخش پلیجو نےکہا کہ جس طرح عدالتوں نےبارہ مئی کے واقعات کا ازخود نوٹس لیا اسی طرح اٹھارہ اکتوبر کے دھماکوں کا نوٹس لیا جائے۔انہوں نےکہا کہ بم دھماکے اور گولیاں ملک میں آئندہ انتخابات کو غیر شفاف بنانے کی سازش ہے۔

یاد رہے کہ کراچی میں اٹھارہ اکتوبر کو پیپلز پارٹی کےاستقبالیہ جلوس میں بم دھماکوں کے خلاف پی پی پی سربراہ بینظیر بھٹونےاتوار کے روز صرف غائبانہ نماز جنازہ ادا کرنے کی اپیل کی تھی مگر اندرون سندھ کے اکثر شہروں میں آج تیسرے روز بھی ہڑتال رہی اور احتجاج کیا گیا۔