انتخاب امیر بی بی سی اردو ڈاٹ کام ، پشاور

	سوات کے علاقے میں شدت پسندوں نے سکیورٹی فورسز کو نشانہ بنایا ہے

امجد حسین کی سربریدہ لاش بدھ کی صبح ہنگو شہر کے قریب واقع ایک گاؤں ’دین‘ کے ایک کھیت میں پڑی ملی جسے اطلاع ملنے پر حکام نے اپنی تحویل میں لے لیا۔

ضلع ہنگو کے ایک پولیس اہلکار نے بی بی سی کو بتایا ہے کہ قبائلی علاقے کُرم ایجنسی سے تعلق رکھنے والے امجد حسین کو بارہ نومبر کو اُس وقت اغواء کرلیا گیا جب وہ مسافروں سے بھری ایک کوسٹر میں دوآبہ سے ہنگو شہر جا رہے تھے۔

اہلکار نے بتایا کہ کوسٹر کو سر پل کے مقام پر چھ مسلح نقاب پبش افراد نے روکا اور اُس میں سوار امجد حسین کو زبردستی کوسٹر سے اتار کر اپنے ساتھ لےگئے۔

حکام امجد حسین اغواء کے دو روز بعد تک باحفاظت بازیاب نہ کراسکے اور نہ ہی بازیابی کے لیے شروع کی گئی تحقیقات میں کوئی خاطر خواہ کامیابی ہوئی۔

پولیس اہلکار نے بی بی سی کو بتایا ہے کہ امجد حسین کے اغوا کے بعد متعلقہ کوسٹر کے ڈرائیور کو پولیس نے حراست میں لے کر تحقیقات شروع کیں لیکن بدھ کی صبح حکام کو امجد حسین کی سربریدہ لاش دین گاؤں کے ایک کھیت میں پڑے ہونے کی اطلاع ملی۔

لاش کے ساتھ رکھے گئے ایک رقعہ میں نامعلوم افراد کی جانب سے قانون نافذ کرنے والے اداروں کے اہلکاروں کومخاطب کرتے ہوئے لکھاگیا ہے کہ وہ سرکار کی نوکری چھوڑ دیں اور یہ بھی لکھا گیا تھا کہ ’جاسوس کا انجام ایسا ہی ہوتا ہے‘۔

پولیس ذرائع کے مطابق پولیس کانسٹیبل کے قتل کے حوالے سے ایف آئی آر پولیس تھانہ ٹل میں درج کر لی گئی ہے۔