عبدالحئی کاکڑ بی بی سی اردوڈاٹ کام، پشاور

	سوات میں تشدد کی تاریخ بہت زیادہ پرانی نہیں

صوبہ سرحد کےضلع سوات میں سکیورٹی فورسز پر تازہ حملہ ایک ایسے وقت کیا گیا ہے جب ایک روز قبل ہی صوبے میں قائم نگران حکومت نے علاقے میں ’حکومتی عملداری ، کو بحال کرنے کے لیے وہاں پر سکیورٹی فورسز کے اضافی دستوں کو تعینات کیا تھا۔

اگرچہ صوبہ سرحد کے نیم قبائلی علاقہ ملاکنڈ ڈویژن کو چند سال قبل کلعدم نفاذ شریعت محمدی کا گڑھ سمجھا جاتا تھا جس کے سینکڑوں مسلح کارکنوں نے نوے کی دہائی میں تنظیم کے سربراہ مولانا صوفی محمد کی سربراہی میں علاقے میں شریعت کے نفاذ کےلیے حکومتی دفاتر پر قبضہ کرلیا تھا تاہم امریکہ پرگیارہ ستمبر کو ہونے والےحملوں کے بعد پاکستان کے فوجی سربراہ جنرل پرویز مشرف نے اس تنظیم پر پابندی لگا دی۔

ضلع سوات میں کئی سال کی خاموشی کے بعد تقریباً دو سال قبل کالعدم نفاذ شریعت محمدی کے اسیر رہنما مولانا صوفی محمد کے داماد بتیس سالہ مولانا فضل اللہ نے امام ڈھیرئی کے مقام پر ایک غیر قانونی ایف ایم اسٹیشن قائم کرکے مغربی ممالک کی پالیسیوں، ٹیلی ویژن، موسیقی، این جی اوز اور بچوں کو پولیو کے قطرے پلانے کےخلاف اور جہاد کے حق میں تقاریر شروع کردیں جس کے نتیجے میں انہیں علاقے میں کافی شہرت حاصل ہوئی۔

ان کی مقبولیت کا اندازہ اس بات سے لگایا جاسکتا ہے کہ جب رواں سال کے اوائل میں سوات پولیس نے انہیں گرفتار کرلیا تو ایف ایم چینل پر ان کی گرفتاری کے اعلان ہونے کےساتھ ہی تقریباً چھ ہزار لوگوں نے نکل کر پولیس اسٹیشن پر دھاوا بول دیا اور انہیں زبردستی پولیس کی حراست سے آزاد کرا دیا۔

	سوات میں سیاحوں کے لیے بہت کشش موجود ہے

حکام کے مطابق مولانا فضل اللہ کے حامیوں نے سن دو ہزار چھ کے دوران مبینہ طور پر ’حکومتی عملداری ،کو چیلنج کرنا شروع کردیا تھا اور انہوں نے’ شاہین فورس‘ کے نام سے ایک ’ مسلح تنظیم، بھی تشکیل دی جس کے تقریباً پانچ ہزار مسلح افراد نے مبینہ طور بازاروں میں گشت کرنا شروع کردیا۔ تاہم ضلع سوات میں امن و امان کی صورتحال اس وقت زیادہ خراب ہوگئی جب حکومت نے اسلام آباد میں لال مسجد کیخلاف آپریشن کرنے کا عندیہ دیا جس کے ردعمل میں مولانا فضل اللہ نے سوات میں ہزاروں لوگوں کے ایک اجتماع سے خطاب کرتے ہوئے کہا کہ آپریشن کے شروع ہونے کے ساتھ ہی وہ ’ جہاد‘ کا اعلان کردیں گے۔آپریشن کے آغاز کے ساتھ ہی سب سے پہلا ردعمل ضلع سوات میں دیکھنے میں آیا جب نامعلوم افراد نے رات کی تاریکی میں مٹہ کے پولیس اسٹیشن پر حملہ کرکے ایک اہلکار کو ہلاک جبکہ چھ کو زخمی کردیا تھا۔

	مولانا فضل اللہ صوفی محمد کے داماد ہیں

متحدہ مجلس عمل کی جانب سے سرحد اسمبلی کی تحلیل کے بعد مرکزی حکومت کو صوبے میں اپنی مرضی کے اقدامات کرنے کاایک سنہری موقع ہاتھ آیا اور واپڈا کے سابق چیئرمین شمس الملک کو نگران وزیراعلی مقرر کرکے ضلع سوات میں دوبارہ بڑی تعداد میں سکیورٹی فورسز کو تعینات کردیا تاکہ وہاں پر حکومتی عملدای قائم کی جاسکے۔

اگرچہ حکومت نے مولانا فضل اللہ کیخلاف فوجی آپریشن نہ کرنے کا اعلان کیا ہے تاہم مولانا فضل اللہ کے ترجمان سراج الدین نے بی بی سی سے بات چیت کرتے ہوئے کہا ہے کہ علاقے میں سکیورٹی فورسز کے اضافی دستوں کی آمد کے بعد پیدا ہونے والی صورتحال کے پیش نظر مولانا فضل اللہ سوات سے دور دراز علاقے دیر منتقل ہوگئے ہیں جہاں وہ کسی بھی حکومتی اقدام سے نمٹنے کے لیے اپنے ساتھیوں سے مشورہ کررہے ہیں۔

سیاسی مبصرین حکومت کو تنقید کا نشانہ بناتے ہوئے کہتے ہیں کہ اس نے لال مسجد کی طرح سوات کی صورتحال کو اس وقت تک سنجیدگی سے نہیں لیا جب تک علاقے میں’ طالبانائزیشن‘ کو اچھی طرح پنپنے کا موقع نہیں مل سکا اور اب اگر حکومت نے صورتحال سے نمٹنے کے لیے فوجی طاقت کواستعمال کرنے کی کوشش کی تو اس کے انتہائی بھیانک نتائج سامنے آسکتے ہیں۔