عبدالحئی کاکڑ بی بی سی اردوڈاٹ کام، پشاور

	جہان آباد میں بدھا کے مجسمے پر حملوں کے بعد خدشہ پیدا ہوگیا ہے کہ علاقے میں تاریخی آثار کو نشانہ بنانے کا رجحان فروغ پائے گا: ماہرین

سوات کے جہان آباد کے علاقے میں پہاڑ کی ڈھلوان پر تراشے گئے بدھا کے اس مجسمے کو نامعلوم مسلح افراد نےگیارہ اور انتیس ستمبر کو دو بار بارود سے اڑانے کی کوشش کی تھی جس کے نتیجے میں مجسمے کے سر کو نقصان پہنچا اور وہ تقریباً ناقابل شناخت ہوگیا ہے۔

سوات میوزیم کے کیوریٹر محمد اقلیم نے بی بی سی کوبتایا کہ گیارہ ستمبر کے حملے کے بعد انہوں نے نامعلوم افراد کے خلاف ایک ایف آئی آر درج کرائی تھی تاہم انتظامیہ نے اس سلسلے میں کسی قسم کا کوئی حفاظتی اقدام نہیں اٹھایا۔ انہوں نے یہ الزام لگایا کہ انتظامیہ کی غفلت کی وجہ سے حملہ آوروں نے حوصلہ پایا اور انہوں نے دوسری مرتبہ بدھا کے مجسمے کو حملےکا نشانہ بنایا جس سے مجسمے کو پہلے حملے سے زیادہ نقصان پہنچا۔

طالبانائزیشن  سوات میں گزشتہ کچھ عرصے سے بڑھتی ہوئی طالبانائزیشن اور خودکش حملوں، سکیورٹی فورسز پر حملوں، گرلز اسکولوں، پولیس اسٹیشنوں اور سی ڈی سینٹروں کو بم حملوں کا نشانہ بنائے جانے کے بعد حکومت کی عملداری شدید طور پر متاثر ہوئی ہے۔مقامی لوگ الزام لگاتے ہیں کہ سکیورٹی فورسز پر براہ راست حملوں کے بعد تاریخی آثار کی حفاظت اب حکومت کی ترجیحات میں شامل نہیں رہی ہے۔ مقامی لوگ

ان کا مزید کہنا تھا کہ انہوں نے صوبائی محمکہ آثار قدیمہ کو ایک خط لکھا ہے جس میں مجسمے کو تیسری دفعہ کسی بھی ممکنہ حملے سے بچانے کے لیے حکومتی اقدامات کی درخواست کی گئی ہے۔

ضلع سوات کےضلعی رابطہ آفسر سید محمد جاوید نے بی بی سی کو بتایا کہ مجسمے پر ہونے والے حملوں کے سلسلے میں تاحال نہ کوئی گرفتاری عمل میں لائی گئی ہے اور نہ ہی ذمہ داران کی نشاندہی ہوسکی ہے۔

	سوات میں سرکاری املاک کو بھی نشانہ بنایا گیا ہے

ان کا کہنا تھا کہ انہوں نے صوبائی وزارت داخلہ کو ایک خط بھیجا ہے جس میں درخواست کی گئی ہے کہ بدھا کے اس تاریخی مجسمے سے متعلقہ علاقے کو سوات میں موجود تقریباً چھ اور علاقوں کی طرح آرکیالوجیکل سائٹ قرار دیا جائے۔

تاریخی ورثہ خطرے میں  حکومت کی عدم دلچسپی کی وجہ سے نہ صرف بدھا کے مجسمے پر ایک اور حملے کا خدشہ ہے بلکہ پوری وادی میں موجود گندھا را تہذیب کے دیگر تاریخی آثار کو بھی مبینہ شدت پسندوں کی طرف سے شدید خطرہ پیدا ہوگیا ہے۔ ماہر آثار قدیمہ پرویز شاہین

انہوں نے اس بات کا اعتراف کیا کہ ضلع سوات میں تاریخی آثار کے علاوہ پلوں، ایف سی کے قلعوں اور دیگر حساس حکومتی مقامات کو بھی مبینہ شدت پسندوں کی طرف سےشدید خطرہ درپیش ہے۔

سوات میں ماہر آثار قدیمہ پرویز شاہین نے، جنکا گھر بدھا کے مجمسے کے بہت ہی قریب واقع ہے، اس بات پر تشویش کا اظہار کیا ہے کہ حکومت کی عدم دلچسپی کی وجہ سے نہ صرف بدھا کے مجسمے پر ایک اور حملے کا خدشہ ہے بلکہ پوری وادی میں موجود گندھا را تہذیب کے دیگر تاریخی آثار کو بھی مبینہ شدت پسندوں کی طرف سے شدید خطرہ پیدا ہوگیا ہے۔

انکے بقول جہان آباد کے علاقے میں واقع بدھا کے مجسمے پر ہونے والوں حملوں کے بعد اب یہ خدشہ بھی پیدا ہوگیا ہے کہ علاقے میں موجود تاریخی آثار کو نشانہ بنائے جانے کا رجحان فروغ پائے گا۔انکے مطابق وادی سوات میں غالیگئی اور ننگریال کے علاقے میں واقع بدھا کے تاریخی مجسموں کے علاوہ شنگردار میں تقریباً دو ہزار سالہ قدیم اسٹوپا کو بھی شدید خطرہ لاحق ہوگیا ہے۔

مقامی لوگوں کا کہنا ہے کہ سوات میں گزشتہ کچھ عرصے سے بڑھتی ہوئی طالبانائزیشن اور خودکش حملوں، سکیورٹی فورسز پر حملوں، گرلز سکولوں، پولیس سٹیشنوں اور سی ڈی سینٹروں کو بم حملوں کا نشانہ بنائے جانے کے بعد حکومت کی عملداری شدید طور پر متاثر ہوئی ہے۔مقامی لوگ الزام لگاتے ہیں کہ سکیورٹی فورسز پر براہ راست حملوں کے بعد تاریخی آثار کی حفاظت اب حکومت کی ترجیحات میں شامل نہیں رہی ہے۔

واضح رہے کہ افغانستان میں طالبان نے سن دوہزار کے دوران بین الاقوامی برادری کی تمام تر اپیلوں کے باوجود وادی بامیان میں موجود بدھا کے مجسمے کو مسمار کر دیا تھا۔تاہم یہ پہلی مرتبہ ہے کہ پاکستان میں بدھا کے تاریخی مجسمے کو مسمار کرنے کی کوشش کی گئی ہے۔