عبدالحئی کاکڑ / رفعت اللہ اورکزئی بی بی سی اردوڈاٹ کام، کانجو (سوات)

	سوات میں چند روز پہلے سکیورٹی فورسز کی تعداد میں اضافہ کیا گیا تھا

اطلاعات کے مطابق جب سکیورٹی فورسز نےمولانا فضل اللہ کے مرکز پر حملہ کرنا چاہا تو دونوں طرف سے فائرنگ شروع ہو گئی جو کئی گھنٹے جاری رہی۔ جمعہ کی شام پانچے بجے سے فائرنگ غیراعلانیہ طور پر چند گھنٹوں کے لیے بند تھی لیکن پھر شروع ہوگئی۔

سوات تشدد کا فرنٹ لائن کیسے بنا؟

سوات میں دھماکہ: تصویروں میں

عینی شاہدین نے کیا دیکھا

سوات میں تشدد کا نیا سلسلہ

مولانا فضل اللہ کے ترجمان سراج الدین نے بی بی سی سے بات چیت کرتے ہوئے دعویٰ کیا کہ جمعہ کی دوپہر سکیورٹی فورسز نے جب ان کے علاقے میں داخل ہونے کی کوشش کی تو اس دوران مولانا فضل اللہ کے ساتھیوں اور سکیورٹی فورسز کے درمیان فائرنگ کا تبادلہ شروع ہوگیا۔ انہوں نے کہا کہ فائرنگ میں ان کا ایک ساتھی ہلاک جبکہ تین زخمی ہوئے ہیں۔

انہوں نے مزید کہا کہ فائرنگ سے مرکز کو کوئی نقصان نہیں پہنچا ہے۔ دیگر اطلاعات کے مطابق جمعہ کے روز چار افراد ہلاک ہوئے جن میں تین سویلین اور مولانا فضل اللہ کا ایک حامی تھا۔

مقامی لوگوں کا کہنا ہے کہ امام ڈھیرئی کے مقام سے فائرنگ کی شدید آوازیں سنائی دے رہی ہیں اور فضا میں ہیلی کاپٹر پرواز کرتے ہوئے نظر آرہے ہیں۔

سکیورٹی فورسز اور مولانا فضل اللہ کے حامیوں کے درمیان حالیہ جھڑپ مینگورہ میں سکیورٹی فورسز کے ٹرک پر ہونے والے حملے کے ایک رو ز بعد ہوئی ہیں جس میں حکام کے مطابق بیس افراد ہلاک اور چونتیس زخمی ہوئے تھے۔

دوسری طرف سوات پولیس کے ایک اہلکار نے بی بی سی کو بتایا کہ مینگورہ پولیس سٹیشن کے ایس ایچ او علی رحمت خان نےنامعلوم ملزمان کے خلاف ایک ایف آئی آر درج کرائی ہے جس میں موقف اختیار کیا گیا ہے کہ جمعرات کی دوپہر سکیورٹی فورسز کی ایک گاڑی جا رہی تھی کہ سوزوکی کار میں سوار ایک خودکش حملہ آور نے اپنی کار گاڑی سے ٹکرادی جس کے نتیجے میں رپورٹ کے مطابق سولہ سکیورٹی اہلکاروں سمیت انیس افراد ہلاک جبکہ چونتیس زخمی ہوگئے تھے۔

آخری اطلاعات کے مطابق سکیورٹی فورسز اور مولانا فضل اللہ کے ساتھیوں کے درمیان فائرنگ کا سلسلہ جاری تھا۔