ریاض سہیل بی بی سی اردو ڈاٹ کام، کراچی

	’علیل والدہ اور بچوں سے ملنے کے لیے واپس دبئی جا رہی ہوں‘

تاہم ان کا کہنا ہے کہ وہ نو نومبر سے پہلے واپس آ جائیں گی۔

پاکستان پیپلز پارٹی کی جانب سے نو نومبر کو راولپنڈی میں جلسے کا اعلان کیا گیا ہے جس سے بینظیر بھٹو کو خطاب کرنا ہے اورگیارہ نومبر کو پارٹی کے اعلان کے تحت وہ آزاد کشمیر کے دورے پر پہنچیں گی۔

ایمرجنسی افواہیں، روانگی ملتوی

بینظیر بھٹو جمعرات کی دوپہر ایک بجے کے قریب اپنےگھر سے ائرپورٹ کے لیے روانہ ہوئیں تاہم ان کے اس پروگرام سے میڈیا کو بے خبر رکھا گیا تھا۔ وہ امارات ائر لائنز کی پرواز ای کے 607 کے ذریعے دبئی کے لیے روانہ ہوئیں۔

ائرپورٹ پر موجود میڈیا سے بات کرتے ہوئے انہوں نے کہا کہ وہ اپنی علیل والدہ اور بچوں سے ملنے کے لیے واپس دبئی جا رہی ہیں۔

بینظیر بھٹو کو پہلے بدھ کی شب دبئی روانہ ہونا تھا اور اس سلسلے میں متحدہ عرب امارات کی ایک ایئرلائن کی پرواز میں ان کی ٹکٹیں بھی بک تھیں لیکن وہ روانہ نہیں ہوئیں جس کی وجہ سے انہوں نے ملک میں ایمرجنسی کے نفاذ کی افواہوں کو قرار دیا تھا۔

بدھ کی رات ایک پریس کانفرنس سے خطاب کرتے ہوئے انہوں نے جنرل مشرف سے کہا کہ صدارتی انتخابات کے بارے میں آئینی درخواستوں کے متعلق سپریم کورٹ کا جو بھی فیصلہ آئے وہ اسے تسلیم کریں اور ان کے خلاف فیصلہ آنے کی صورت میں ملک میں ایمرجنسی نافذ کرنے سے گریز کریں ورنہ عوام سڑکوں پر آجائیں گے۔

بینظیر بھٹو آٹھ سالہ خود ساختہ جلاوطنی کے بعد اٹھارہ اکتوبر کو کراچی پہنچیں تھیں اور ان کے استقبالیہ جلوس میں بم دھماکہ ہوئے تھے جس میں ایک سو چالیس سے زائد افراد ہلاک ہوگئے تھے۔ بینظیر بھٹو کی آمد سے قبل حکومت کی جانب سے انہیں مشورہ دیا گیا تھا کہ وہ کچھ ماہ کے لیے اپنی آمد ملتوی کر دیں مگر وہ اپنے اعلان کے تحت پاکستان آئی تھیں۔