احمد رضا بی بی سی اردو ڈاٹ کام، کراچی

	18 اکتوبر کا واقعہ جمہوریت کی خلاف ایک سازش تھی: جاوید ہاشمی

ملاقات لگ بھگ ایک گھنٹے تک جاری رہی۔ملاقات کے بعد صحافیوں سے بات چیت کرتے ہوئے جاوید ہاشمی نے کہا کہ بینظیر بھٹو کے استقبالیہ جلوس میں ہونے والے بم دھماکے جمہوریت پر حملہ تھے۔

انہوں نے کہا کہ یہ واقعہ جمہوریت کی راہ میں رکاوٹیں کھڑی کرنے کی سازش تھی جو آئندہ بھی ہوسکتی ہے اس لیے تمام سیاسی جماعتوں کو مل کر جمہوریت کی جنگ لڑنی چاہیئے اور جمہوریت کی بحالی کے ایک نکاتی ایجنڈے پر متفق ہوجانا چاہیئے جو میثاق جمہوریت اور اے آر ڈی کے منشور کا بھی حصہ تھا۔

انہوں نے کہا کہ بینظیر بھٹو سے میثاق جمہوریت پر بھی بات ہوئی اور پیپلز پارٹی کی چئرپرسن نے اس بات پر اتفاق کیا کہ میثاق جمہوریت پر فریقین کو قائم رہنا چاہیئے اور اس پر عمل پیرا رہتے ہوئے آپس میں رابطے بڑھانے چاہئیں۔

’بے شک ہمارا اختلاف رائے رہے، سیاسی اختلاف رائے ہر ایک کا ہوتا ہے اور ہم اپنے اپنے سیاسی ایجنڈے پر الیکشن بھی لڑیں گے لیکن ایک قومی سیاسی ایجنڈہ ایسا ہونا چاہیئے جس کے ذریعے جمہوریت کو آگے بڑھایا جاسکے۔‘

انہوں نے کہا کہ سیاسی جماعتوں کو اہم امور پر جماعتی سطح کے بجائے قومی سطح پر مل بیٹھ کر بات کرنی چاہیئے۔ اے آر ڈی کے مستقبل کے حوالے سے پوچھے گئے ایک سوال پر جاوید ہاشمی نے کہا کہ اس سلسلے میں بینظیر بھٹو سے ملاقات کے دوران قومی سطح پر باہمی رابطوں کو جاری رکھنے پر اتفاق ہوا ہے۔