بیورو رپورٹ بی بی سی اردو ڈاٹ کام، اسلام آباد

	مسلم لیگ (ن) سے بھی بات ہوسکتی ہے: چوہدری شجاعت

بدھ کو اسلام آباد میں پارٹی دفتر میں صحافیوں سے بات کرتے ہوئے انہوں نے کہا کہ محترمہ کو سوئس عدالت پر اعتماد نہیں لیکن وہ اٹھارہ اکتوبر کے واقعات کی تحقیقات کے لیے غیرملکیوں کو لانے کا مطالبہ کر رہی ہیں۔’انہیں اپنی عدالتوں سے انصاف کی توقع نہیں، ججز اور پولیس پر اعتبار نہیں۔ ایسی صورت میں کیا کیا جاسکتا ہے؟‘

ایک سوال پر انہوں نے کہا کہ مصالحتی عمل نظام کی درستگی کے لیے شروع کیا گیا تھا لیکن جو کچھ ہوا ہے اس کے بعد مصالحتی عمل آگے نہیں بڑھ سکتا۔

چوہدری شجاعت حسین نے کہا کہ پیپلزپارٹی کے ساتھ مفاہمت کا عمل نہ چل سکا تو دوسری جماعتوں کے ساتھ چلایا جائے گا۔ اس بارے میں ان کا کہنا تھا کہ مسلم لیگ (ن) سے بھی بات ہوسکتی ہے۔

چوہدری شجاعت حسین نے کہا کہ بے نظیر بھٹو غیرملکی ایجنڈا لے کر آئی ہیں اور حکومت حاصل کرنے کے لیے سفارشیں کرا رہی ہیں لیکن فیصلہ عوام نے کرنا ہے غیرملکیوں نے نہیں کرنا ہے ۔ انہوں نے کہا کہ ’نگران حکومت کے بارے میں پیپلزپارٹی سے ہی نہیں تمام سیاسی جماعتوں سے مشاورت ہو رہی ہے اور نام مانگے جا رہے ہیں۔‘

آل پارٹیز کانفرنس بلانے کے بارے میں ان کا کہنا تھا کہ اس سلسلے میں ابھی کوئی پیش رفت نہیں ہوئی۔