عبدالحئی کاکڑ بی بی سی اردوڈاٹ کام، پشاور

	اکرم خان درانی اور آٹھ وزاراء سمیت بیالیس ارکانِ اسمبلی نے استعفے پارٹی قیادت کو پیش کردیئے ہیں

ایم ایم اے میں شامل جماعت اسلامی کے پچیس اراکین اسمبلی، عوامی نیشنل پارٹی، مسلم لیگ (ن) اور تحریک انصاف کے واحد رکن صوبائی اسمبلی پہلے ہی اپنے استعفے پارٹی قائدین کے پاس جمع کرا چکے ہیں۔

جمیعت علماء اسلام( ف ) سے تعلق رکھنے والے ان اراکین نے اپنے استعفے سنیچر کو پشاور میں ہونے والے پارٹی کے اجلاس کے دوران ایم ایم اے کے صوبائی صدر اور رکن قومی اسمبلی مولانا گل نصیب خان کے حوالے کیے۔

صوبائی وزیر قانون ملک ظفر اعظم نے بی بی سی سے بات چیت کرتے ہوئے کہا کہ اپنی جماعت کی پارلیمانی لیڈر کی حیثیت سے انہوں نے وزیر اعلیٰ سرحد اکرم خان درانی اور آٹھ صوبائی وزراء سمیت بیالیس ارکانِ اسمبلی کے استعفے پارٹی قیادت کو پیش کر دیئے ہیں۔

انہوں نے کہا کہ ان کی جماعت نےآل پارٹیز ڈیموکریٹک الائنس کے پشاور میں ہونے والے اجلاس میں کیے گئے فیصلے کی تعمیل کی ہے اور انہیں ’فخر ہے کہ وہ آمریت کے خلاف حکومت چھوڑ دینے کی قربانی دے رہے ہیں۔‘

واضح رہے کہ آل پارٹیز ڈیموکریٹ الائنس نے ستائیس ستمبر کو ایک اجلاس میں فیصلہ کیا تھا کہ 29 ستمبر کو اے پی ڈی ایم میں شامل جماعتوں کے ارکانِ قومی و صوبائی اسمبلی اپنے استعفے پارٹی قیادت کے پاس جمع کرا دیں گے اور بعد میں اے پی ڈی ایم کی قیادت یہ استعفے 2 اکتوبر کو قومی اور صوبائی سپیکر حضرات کے پاس جمع کرائیں گے جبکہ اسی روز سرحد کے وزیر اعلیٰ اکرم خان درانی گورنر سرحد علی محمد اورکزئی کو اسمبلی کو تحلیل کرنے کی سفارش کریں گے۔