علی احمد خان بی بی سی اردو ڈاٹ کام، ایبٹ آباد

	دوسری پارٹیاں یا گروہ اتنے چھوٹے ہیں کہ علیحدہ ان کا وجود اور عدم وجود برابر ہے

یہ ایک انتہائی اہم لیکن خطرناک فیصلہ ہے اور اس بات کا ثبوت بھی ہے کہ اتحاد میں شامل جماعتوں کو یقین ہوگیا ہے کہ وہ کوئی ایسی ملک گیر تحریک فی الحال نہیں چلاسکتیں جو صدر مشرف اور موجودہ حکومت کو ان کے مطالبات تسلیم کرنے پر مجبور کردے۔ خطرناک اس لئے ہے کہ اگر اس اتحاد کے اراکین مستعفی ہوبھی جائیں تو ایک اخلاقی دباؤ کے سوا عملی طور پر اس کا صدر مشرف کے انتخاب پر کیا اثر پڑے گا، جناب صدر اور ان کی پارٹی کواور چھوٹ مل جائے گی، بالکل جیسے کوریا کی جنگ کے دوران اقوام متحدہ نے سوویت مخالفت کے باوجود اپنی فوجیں بھیجنے کا فیصلہ کرلیا اس لئے کہ سوویت مندوب سلامتی کونسل کے اجلاس کا بائیکاٹ کر رہے تھے۔

دوسری جانب اگر اتحاد میں شامل کسی پارٹی یا افراد نے ایسا نہیں کیا تو جہاں یہ تحریک ناکام ہوگی وہاں عوام کی نظر میں اتحاد کی بڑی بھد ہوجائےگی اور اس بات کے امکان کو رد نہیں کیا جاسکتا۔

بعض حلقوں کی جانب سے قومی اسمبلی میں حزب اختلاف کے لیڈر مولانا فضل الرحمٰن کے بارے میں اب بھی شکوک وشبہات ظاہر کئے جا رہے ہیں اس لئے کہ انہیں اس طرح کا کوئے اقدام کرنے سے پہلےصوبہ سرحد اور بلوچستان میں اپنی پارٹی کے مفادات کا سنجیدگی سے جائزہ لینا ہوگا۔

نظریاتی بنیاد نہ پروگرام  پاکستان کی موجودہ صورتحال پر ایک نظر ڈالنے سے اندازہ ہوتا ہے کہ تمام سیاسی جماعتیں، وہ اقتدار میں ہوں یا اختلاف میں، غیر منظم سیاسی گروہ بن کر رہ گئی ہیں جن کی نہ کوئی نظریاتی بنیاد ہے نہ کوئی واضح سیاسی و سماجی پروگرام

پاکستان کی موجودہ صورتحال پر ایک نظر ڈالنے سے اندازہ ہوتا ہے کہ تمام سیاسی جماعتیں، وہ اقتدار میں ہوں یا اختلاف میں، غیر منظم سیاسی گروہ بن کر رہ گئی ہیں جن کی نہ کوئی نظریاتی بنیاد ہے نہ کوئی واضح سیاسی و سماجی پروگرام۔ محض شخصیات پر انحصار ہے اور یہی وجہ ہے کہ ان کے اراکین کو بھی اپنی وفاداریاں بدلنے میں کوئی عار محسوس نہیں ہوتا، جس کا پلہ بھاری دیکھا اس طرف لڑھک گئےاور جو ایسا نہیں کرتے وہ بھی یہ ثابت کرنے کے لئے کہ’دیکھئے ہم برے وقت میں بھی آپ کے ہی ساتھ رہے۔‘

خود حکمراں مسلم لیگ اور صدر پرویز مشرف میں تعلق کی کوئی نظریاتی یا اخلاقی بنیاد نظر نہیں آتی،ماسوا اس کے کہ دونوں کو معلوم ہے کہ اگر ایک گیا تو دوسرے کا بھی وجود خطرے میں پڑ جائےگا۔ باقی جو دوسری پارٹیاں یا گروہ ان کے ساتھ نتھی ہیں وہ اتنے چھوٹے ہیں کہ حکومت میں شامل رہ کرہی زندہ رہ سکتے ہیں علیحدہ ان کا وجود اور عدم وجود برابر ہے۔

	مولانا فضل الرحمٰن کے بارے میں اب بھی شکوک وشبہات ظاہر کئے جا رہے ہیں

مسلم لیگ (ن) کا حال یہ ہے کہ ’ن‘ نکال دیجئے تو کچھ نہیں بچتا۔ اس کا ایک ثبوت تو یہ ہے کہ میاں نواز شریف کے آنے کا اتنا شور تھا وہ سعودی عرب چلے گئے تو باقی سب اپنے اپنے گھر چلے گئے۔

ایسی صورت میں اس طرح کا فیصلہ ایک طرح کا سیاسی جوا ہے جس کی کامیابی کا انحصار سو فیصد اتحاد میں شامل رہنماؤں کی دیانتدار اور بے لوثی پر ہے۔ اگر ان میں سے کسی نے اس سے انحراف کیا، جسکے امکان کو رد نہیں کیا جاسکتا، توعوام کی مایوسی اور بددلی کی شکل میں اس کی بھاری قیمت ادا کرنی پڑے گی۔