ہارون رشید بی بی سی اردو ڈاٹ کام، اسلام آباد

اس کا اعلان اے پی ڈی ایم کے رہنماؤں نے اسلام آباد میں جوائنٹ ایکشن کمیٹی کے ایک اجلاس کے بعد کیا ہے۔

مسلم لیگ نواز کے چیئرمین راجہ ظفر الحق نے اجلاس کے بعد صحافیوں کو فیصلوں سے آگاہ کرتے ہوئے کہا کہ شریف برادران کسی بھی ’قانونی طور پر قائم عدالت‘ کا سامنا کرنے کے لیے تیار ہیں۔

مسلم لیگی رہنما نے اب تک حکومت پر ایک ہزار افراد کو شریف برادران کے استقبال سے روکنے کی خاطر حراست میں لیے جانے کا الزام لگایا ہے۔

ادھر مسلم لیگ نواز کی جانب سے جمعہ کو بعض اخبارت میں رنگین اشتہارات شائع کیے گئے ہیں جن میں عوام کو دس ستمبر کو صبح گیارہ بجے اسلام آباد ائرپورٹ آنے کے لیے کہا گیا ہے۔ نواز اور شہباز شریف کی تصاویر والے اس اشتہار میں دس ستمبر کو قانون کی بالادستی اور جمہوریت کی فتح کا دن قرار دیا گیا ہے۔

راجہ ظفر الحق کی رہائش گاہ پر ہونے والے اس اجلاس میں اے پی ڈی ایم کی تمام سیاسی جماعتوں کے مرکزی رہنماؤں نے شرکت کی۔ یاد رہے اس اتحاد میں پیپلز پارٹی شامل نہیں۔

راجہ ظفر الحق کا کہنا تھا کہ نواز اور شہباز شریف دس ستمبر کو پاکستان ضرور آئیں گے۔ ان کا کہنا تھا کہ اے پی ڈی ایم کی قیادت مل کر ہوائی اڈے استقبال کے لیے جائے گی جب کہ چاروں صوبوں سے کارکن بھی آئیں گے۔

اجلاس میں قاضی حسین احمد کی آئینی درخواست میں بھی فریق بننے کا فیصلہ بھی کیا گیا جو انہوں نے سپریم کورٹ میں صدر کے عہدے کی اہلیت کو چیلنج کرنے کے لیے دی ہوئی ہے۔

اے پی ڈی ایم نے چیف جسٹس یا ججوں کی ملازمت کی میعاد کم کرنے سے متعلق اخباری اطلاعات پر تشویش کا اظہار کرتے ہوئے اس کی مخالفت کا اعلان کیا۔ ’اگر کسی جج کی مدت ملازمت میں ایک روز کی بھی کمی کی گئی تو اسے عدلیہ پر وار تصور کیا جائے گا‘۔

اپوزیشن اتحاد نے وکلاء کی صدر مخالف تحریک کی بھی حمایت کا فیصلہ کیا اور کہا کہ وہ ان کے ایجنڈے کو قبول کرتے ہیں۔

راجہ ظفر الحق کا کہنا تھا کہ شریف برادارن کے استقبال کے لیے آنے والی عوام کی راہ میں رکاوٹ پیدا کر کے حکومت اپنے اختتام کا سامان کرے گی۔