عبادالحق بی بی سی اردو ڈاٹ کام ، لاہور

	’ہم چاہتے کہ پوری قوم سپریم کورٹ کے پیچھے کھڑی ہو‘

مجلس عمل آل پاکستان ڈیموکریٹک موومنٹ کا حصہ ہے۔

اتوار کوایک کتاب کی رونمائی کی تقریب کے بعد قاضی حسین احمد نے اخبارنویسوں سے بات چیت میں کہا کہ اگر بے نظیر بھٹو نے یہ کہہ دیا کہ ان کی جنرل مشرف سے ڈیل نہیں ہورہی ہے تو یہ بہت اچھی بات ہے۔

ان کے کہنا ہے کہ اے پی ڈی ایم کا مقصد ملک سے آمریت کا خاتمہ ہے۔

ایک سوال پر انہوں نے کہا کہ حکومت ہزار بار رابطہ کرے لیکن کسی فوجی آمریت کا تقویت پہنچانا متحدہ مجلس عمل کے ایجنڈے میں شامل نہیں ہے۔ان کے بقول آمریت کوکسی صورت سہارا نہیں دیا جائے گا اور نہ مشرف حکومت سے کوئی اتحاد ہوگا۔

ان کا کہنا ہے کہ سپریم کورٹ نے فیصلہ دیا ہے کہ سابق وزیراعظم نواز شریف کو وطن واپس آنے کا حق ہے اور وہ ملک واپس آئیں گے۔ ان کے بقول نواز شریف کی وطن واپسی پران کے ساتھ کسی زیادتی کی کوشش کی گئی تو سپریم کورٹ موجود ہے اس سے رجوع کیا جائےگا اور عدالت سے ان کے ضمانتیں ہوسکتی ہیں۔

انہوں نے بتایا کہ مجلس عمل کا اجلاس تین ستمبر کواسلام آباد میں ہورہا ہے جس میں ملک کی موجودہ صورت حال کے بارے میں غور کیا جائےگا اور مجلس عمل اپنی حکمت عملی ترتیب دے گی۔

انہوں نے کہا کہ مجلس عمل بحالِی جمہوریت کے لیے وکلاء تحریک کے دوسرے مرحلے میں بھرپور حصہ لےگی۔ان کا کہناہے کہ ہم چاہتے ہیں کہ پوری قوم سپریم کورٹ کے پیچھے کھڑی ہو۔