محمد اشتیاق بی بی سی اردو ڈاٹ کام، اسلام آباد

	’جرنیلوں نے عالمی طاقتوں کی تائید حاصل کرنے کے لیے آپریشن کیا گیا‘

لال مسجد آپریشن، خصوصی ضمیمہ

لال مسجد آپریشن، تصاویر اور ویڈیوز

مولانا فضل الرحمن نے جنرل مشرف کو زبردست تنقید کا نشانہ بناتے ہوئے کہا کہ اُنہوں نے یہ سب کچھ اپنا اقتدار کو بچانے کے لیے کیا اور اس عمل سے ملک کی سلامتی کو شدید خطرہ ہے اور ملک خانہ جنگی کی طرف جا سکتا ہے۔

مولانا فضل الرحمن کا کہنا تھا کہ اس میں کوئی شک نہیں کہ یہ سب کچھ فوج نے کیا، کیونکہ کہ جب یہ آپریشن کیا گیا اُس وقت ملک میں نہ تو وزیر داخلہ تھے اور نہ ہی سیکرٹری داخلہ۔

قاضی حسین احمد کا کہنا تھا کہ فوج کےاس آپریشن سے شمالی وزیرستان میں جو معاہدہ ہوا تھا وہ بھی خطرے میں پڑ سکتا ہے۔

پریس کانفرنس میں موجود جمیعت علماء اسلام کے غفور حیدری کا کہنا تھا کہ حکومت ہلاک ہونے والوں کی تعداد کو چھپانے کی کوشش کر رہی ہے اور اُن کے اندازے کے مطابق لال مسجد اور جامعہ حفصہ میں ہلاک ہونے والوں کی تعداد چار سو سے ایک ہزار تک ہو سکتی ہے۔

غفورحیدری کا کہنا تھا کہ اُن کی اطلاعات کے مطابق ایک تابوت میں ایک سے زائد لاشوں کو دفنایا جا رہا ہے۔

مولانا فضل الرحمن کا کہنا تھا کہ حکومت جو کئی بار یہ کہہ چُکی ہے کہ پاکستان کے مدرسوں میں کسی قسم کی دہشت گردی کی تعلیم نہیں دی جاتی، لیکن اب حکومت اسلام آباد کی لال مسجد کو جواز بنا کر ملک بھر کے مدرسوں کو دھمکیاں دے رہی ہے۔

اُنہوں نے کہا کہ وہ مسلح جدوجہد کے حق میں نہیں ہیں لیکن وہ ملک بھر میں علما کے ساتھ مل کر دینی مدارس کے استحقاق کی جنگ لڑتے رہیں گے۔

پریس کانفرنس کے شرکاء کا کہنا تھا کہ اگر عبدالرشیدغازی اور اُن کے ساتھیوں کے پاس اتنا اسلحہ ہوتا جتنا کہ اب دکھایا جارہا، تو وہ لوگ کئی دن تک لڑ سکتے تھے۔