جاوید سومرو بی بی سی اردو ڈاٹ کام، لندن

	گزشتہ برسوں میں انتہا پسندوں کو بہت ڈھیل دی گئی ہے: بے نظیر بھٹو

بی بی سی اردو سے بات کرتے ہوئے ان کا کہنا تھا کہ حکومت نے بہت کوشش کی کہ مسئلہ مذکرات سے حل ہو جائے لیکن مذاکرات کامیاب نہیں ہوئے۔ انہوں نے کہا کہ غازی عبدالرشید پہلے ہی کہہ چکے تھے کہ ان کے پاس خود کش بمبار موجود ہیں اور اگر حکومت ان کے مطالبات نہیں مانتی تو وہ ان بمباروں کو استعمال کریں گے۔

عبدالرشیدغازی ہلاک

لال مسجد پر خصوصی ضمیمہ

عبدالرشید سے مولانا

لال مسجد آپریشن، ایک ہفتہ مکمل

ایس ایس جی کمانڈو کرنل ہلاک

لال مسجد: فوجی کارروائی جاری

اس سوال کے جواب میں کہ آیا حکومت کو مذاکرات کو مذید وقت نہیں دینا چاہئے تھا، بے نظیر بھٹو نے کہا کہ ایسا کرنے سے مذید خرابی ہوتی۔

ان کا کہنا تھا کہ اسلام آباد میں کرفیو لگا ہوا تھا جس سے عام شہری متاثر ہو رہے تھے۔ لال مسجد اور اس سے ملحقہ مدرسے میں چھپے ہوئے عسکریت پسند انسانوں کو ڈھال کے طور پر استعمال کر رہے تھے۔ ’ یہ کہنا کہ سیز فائر یا فرار کا راستہ دینے سے مسئلہ حل ہو سکتا تھا غلط ہے کیونکہ ایسا کرنے سے حالات ٹھیک ہونے کی بجائے مزید خراب ہو جاتے۔‘

آپریشن سائلنس کے ممکنہ ردعل کے بارے میں ایک سوال کے جواب میں بے نظیر بھٹو نے کہا کہ مدارس کی جانب سے شدید رد عمل ہو سکتا ہے، لیکن ان کا کہنا تھا کہ پاکستان میں گزشتہ چند برسوں کے دوران انتہا پسندوں کو بہت ڈھیل دی گئی ہے جس سے انتہا پسندوں نے فائدہ اٹھایا ہے۔

ان کا کہنا تھا کہ ہمارے ملک میں کئی ایسے مدارس ہیں جو دراصل غیر رسمی فوجی ہیڈکوارٹر بن چکے ہیں۔ ’ہماری ریاست کو اپنے عوام کو تحفظ دینا ہوگا۔‘

بے نظیر بھٹو نے کہا کہ پاکستانی فوج کے اہلکار قبائلی علاقوں میں انتہا پسندوں کے خلاف کارروائیوں میں شہید ہو رہے تھے۔ اس کے علاوہ عسکریت پسندوں نے اسلام آباد میں بھی پولیس اہلکاروں کو اغوا کرنا شروع کر دیا تھا۔

ان کے بقول لال مسجد آپریشن کے ذریعے حکومت نے ایک لکیر لگائی ہے کہ وہ انتہا پسندوں کو اس سے آگے نہیں آنے دے گی۔’ تاہم ہمیں دیکھنا ہوگا کہ مستقبل میں کیا ہوتا ہے، کہیں حکومت ان کو دوبارہ ڈھیل تو نہیں دے گی؟‘