رفعت اللہ اورکزئی بی بی سی اردو ڈاٹ کام، پشاور

	سوات میں گزشتہ دو ماہ کے دوران سکیورٹی فورسز پر حملوں میں اضافہ دیکھنے میں آیا ہے

ہلاک ہونے والوں میں سوات میڈیکل انسٹیٹیوٹ کے پرنسپل ڈاکٹر سمیع اللہ اور ایک گیسٹ ہاؤس کے منیجر علی محمد عمرزئی جبکہ زخمیوں میں ضلعی ناظم سوات کے سیکریٹری شامل ہیں۔

سوات کے ضلعی رابطہ افسر سید محمد جاوید نے بی بی سی کو بتایا کہ یہ واقعہ پیر کو ساڑھے چار بجے کے قریب کالام بازار کے قریب اوشو سڑک پر پیش آیا۔

ان کے مطابق ایک پجیرو گاڑی اوشو روڈ پر جارہی تھی کہ سڑک پر پہلے سے نصب ریموٹ کنٹرول بم پھٹنے سے وہاں ایک زور دار دھماکہ ہوا، جس سے گاڑی میں سوار چار افراد نے موقع پر جبکہ ایک نے ہسپتال جا کر دم توڑ دیا۔

زخمیوں میں سے تین کا تعلق فیصل آباد سے بتایا جارہا ہے۔ زخمیوں کو سیدو شریف ہسپتال منتقل کردیا گیا ہے۔

عینی شاہدین کا کہنا ہے کہ دھماکے میں سات افراد زخمی ہوئے ہیں جن میں دو مقامی بچے بھی شامل ہیں جو دھماکے کے وقت سڑک کے کنارے کھڑے تھے۔

مقامی صحافی رحمت دین صدیقی کے مطابق دھماکے کے بعد گاڑی میں آگ بھڑک اٹھی جس سے لاشیں اور زخمی بری طرح جھلس گئے ہیں۔

انہوں نے بتایا کہ دھماکے کے وقت وہاں سڑک پر ایک اور گاڑی بھی گزر رہی تھی جس میں فیصل آباد کے تین افراد زخمی ہوئے ہیں جبکہ گاڑی مکمل طورپر تباہ ہوگئی ہے۔

مقامی صحافی نے بتایا کہ چودہ اگست کے سلسلے میں سیاحوں کی ایک بڑی تعداد کالام آئی ہوئی ہے، تاہم اس واقعہ کے بعد علاقے میں سخت خوف وہراس پایا جاتا ہے۔

واضح رہے کہ سوات میں گزشتہ دو ماہ کے دوران سکیورٹی فورسز اور سرکاری اہلکاروں پر حملوں میں اضافہ دیکھنے میں آیا ہے۔