ہارون رشید
بی بی سی اردو ڈاٹ کام، پشاور |  |
|  سوات پاکستان کے خوبصورت ترین علاقوں میں شمار ہوتا ہے |
صوبہ سرحد کے پہاڑی علاقے سوات میں مٹہ کے مقام پر پولیس کا کہنا ہے کہ جمعرات کی صبح ایک دھماکے میں دو شخص ہلاک ہوئے ہیں۔ ہلاک شدگان کی شناخت ابھی نہیں ہوسکی ہے۔ مٹہ سے موصول اطلاعات کے مطابق یہ دھماکہ آج صبح بائے درا گاؤں میں اس وقت ہوا جب یہ دو مشتبہ افراد علاقے میں بارودی سرنگیں نصب کر رہے تھے۔ پولیس کو شک ہے کہ یہ ہلاکتیں ایک بارودی سرنگ کے پھٹ جانے سے ہوئی ہیں۔ پولیس کے مطابق ان افراد سے واکی ٹاکی بھی برآمد ہوئی ہے۔ اس واقعے کی تناظر میں مٹہ کے علاقے کی خصوصیت میں نے مینگورہ کے صحافی افتخار خان سے پوچھی تو انہوں نے بتایا کہ یہ علاقہ ماضی میں کالعدم تحریک نفاذ شریعت محمدی جیسی تنظیم کا گڑھ رہا ہے جبکہ ملک کے دیگر حصوں میں دہشت گردی کے واقعات میں ملوث کئی افراد بھی اسی علاقے سے گرفتار کیے گئے ہیں۔ پولیس کے مطابق ہلاک ہونے والے مقامی نظر نہیں آتے۔ نصب کی جانے والی بارودی سرنگوں کو ناکارہ بنانے کے لیے پشاور سے بم ڈسپوزل سکواڈ روانہ کر دیا گیا ہے۔ یہ بھی معلوم نہیں ہوسکا کہ بارودی سرنگیں نصب کرنے کا مقصد یا ہدف کون تھا۔ پولیس کے مطابق مزید تفتیش جاری ہے اور ان افراد کی شناخت کی کوشش کی جا رہی ہے۔ ماضی میں سوات کا دلکش پہاڑی علاقہ سیاحوں کی توجہ کا مرکز بھی رہا ہے۔ لیکن ان دھماکوں اور ماضی قریب میں گرفتاریوں کے بعد یہاں کا سیاحتی سیزن ہی خطرے میں پڑتا نظر آ رہا ہے۔ | 
یہ صفحہ دوست کو ای میل کیجیئے
پرِنٹ کریں
