دلاور خان وزیر، انتخاب امیر بی بی سی اردو ڈاٹ کام

	انتظامیہ نے سکاؤٹس کی بازیابی کے لیے کوششیں شروع کر دی ہیں

مقامی انتظامیہ کے مطابق چیک پوسٹ پر حملے میں زخمی ہونے والوں میں تین فوجی اہلکار اور دو سکاؤٹس شامل ہیں جنہیں بذریعہ ہیلی کاپٹر بنوں فوجی ہسپتال منتقل کر دیا گیا ہے۔

انتظامیہ کے مطابق ہلاکتوں میں مزید اضافے کا اندیشہ ہے۔ مقامی انتظامیہ کا یہ بھی کہنا ہے کہ اس جھڑپ میں دونوں جانب سے بھاری ہتھیاروں کا استعمال کیا گیا۔ مقامی حکام کا یہ بھی کہنا ہے کہ بویا اور دتہ خیل کے علاقے میں مشکوک ٹھکانوں پر توپخانے کا استعمال بھی کیا گیا ہے۔

ادھر جنوبی وزیرستان میں نامعلوم مسلح افراد نے جنوبی وزیرستان سکاؤٹس کے سولہ اہلکاروں کو اغواء کر لیا ہے۔ اسلام آباد میں سرکاری ذرائع نے اس اطلاع کی تصدیق کرتے ہوئے بی بی سی اردو ڈاٹ کام کو بتایا ہے کہ فرنٹیئر کور کے یہ اہلکار جنوبی وزیرستان میں جنڈولہ سے سراروغہ جاتے ہوئے لاپتہ ہوئے۔

یاد رہے کہ جنوبی وزیرستان سکاؤٹس فرنٹیئر کور کا ایک حصہ ہیں۔

جنوبی وزیرستان کی مقامی انتظامیہ کے مطابق یہ واقعہ جمعرات کی شام اس وقت پیش آیا جب جنڈولہ سےسراروغہ جانے والے سکاؤٹس کی گاڑی کو سپن کئی راغزئی کے مقام پر نامعلوم مسلح افراد نے روکا اور گاڑی میں سوار اہلکاروں کو اغواء کر کے نامعلوم مقام کی جانب لےگئے۔

سرکاری ذرائع کا کہنا ہے کہ جنوبی وزیرستان ایجنسی انتظامیہ نے سکاؤٹس کی بازیابی کے لیے کوششیں شروع کر دی ہیں اور اغوا کاروں سے رابطہ کے لیے علاقے کے عمائدین کا تعاون حاصل کیا گیا ہے ۔

جنڈولہ صوبہ سرحد کے ضلع ٹانک سے ملحق علاقہ ہے جہاں مقامی طالبان نے گذشتہ چند ماہ میں کئی مرتبہ فوج سمیت قانون نافذ کرنے والے دیگر اداروں کے اہلکاروں پر حملے کیے ہیں۔گزشتہ ماہ چھبیس جولائی کو بھی جنوبی وزیرستان میں سروکئی کے علاقے میں نامعلوم افراد نےایک فوجی چوکی پر راکٹوں سے حملہ کیا تھا جس کے نتیجے میں سندھ رجمنٹ کا ایک حوالدار ہلاک ہوا تھا جبکہ حملے میں چوکی کو بھی شدید نقصان پہنچا تھا۔