دلاور خان وزیر بی بی سی اردو ڈاٹ کام، ڈیرہ اسماعیل خان

	حکومت کی کوشش ہے کہ شمالی اور جنوبی وزیرستان میں قبائلی عمائدیتن کو لویا جرگے میں جانے پر راضی کیا جائے

مقامی انتظامیہ کا کہنا ہے کہ منگل کو صبح پانچ بجے شمالی وزیرستان کے صدر مقام میرانشاہ کے علاقے میں سکیورٹی فورسز نے کارروائی کی جس میں گن شپ ہیلی کاپٹروں کے علاہ توپخانے کا استعمال بھی کیا گیا۔

مقامی انتظامیہ کے مطابق فوج کو اطلاع ملی تھی کہ میرانشاہ سے کوئی تیس کلومیٹر دور افغان سرحد کے قریب ایک جگہ سے فوج پر حملے کی تیاری کی جارہی ہے جس پر سکیورٹی فورسز نے مذکورہ ٹھکانے کو نشانہ بنایا۔

فوج کے ترجمان میجر جنرل وحید ارشد نے بی بی سی اردو سروس کو بتایا کہ اس کارروائی میں دس شدت پسندوں کو ہلاک کر دیا گیا ہے۔

انہوں نے کہا کہ اس حملے میں بڑی تعداد میں اسلحہ بارود بھی تباہ کر دیا گیا کیونکہ جس جگہ کارروائی کی گئی وہاں سے بہت دیر تک دھماکوں کی آوازیں سنی جاتی رہیں۔

یاد رہے کہ حکومت اور مقامی طالبان کے مابین امن معاہدہ ختم ہونے کے بعد سے علاقے میں ایک دوسرے کے خلاف کارروائی ہوتی رہتی ہیں۔ لیکن منگل کی کارروائی ایک ایسے موقع پر کی گئی کہ جب شمالی اور جنوبی وزیرستان کے قبائلی عمائدین نے افغان لویا جرگہ میں شرکت سے انکار کیا ہے اور حکومت اس کوشش میں ہے کہ دونوں ایجنسیوں سے تعلق رکھنے والے قبائلی عمائدین کو جرگے میں شرکت کرنے پر راضی کیا جائے۔