ہارون رشید بی بی سی اردو ڈاٹ کام، پشاور

	حکومت کے ساتھ مذاکرات کا عمل تعطل کا شکار ہے: طالبان

کسی نامعلوم مقام سے بی بی سی سے بات کرتے ہوئے طالبان کے ایک ترجمان عبدالحئی غازی نے کہا کہ سکیورٹی فورسز نے خالی مکانات کو نشانہ بنایا۔ ان کا کہنا تھا کہ قریب میں گاؤں کے لوگ بھی حملے کے آغاز کے بعد علاقے سے نکل گئے تھے۔

تاہم ان کے مطابق گولہ باری اور ہیلی کاپٹروں سے حملوں کا سلسلہ صبح دس بجے تک جاری رہا۔ ’اگر کوئی گاؤں کا شخص یا بچہ زخمی ہوا ہو تو ہو، ہمارا کوئی زخمی یا ہلاک نہیں ہوا ہے۔‘

سرکاری ذرائع کے مطابق منگل کو صبح پانچ بجے شمالی وزیرستان کے صدر مقام میرانشاہ سے تیس کلومیٹر دور دیگان کے مقام پر سکیورٹی فورسز نے کارروائی کی جس میں گن شپ ہیلی کاپٹروں کے علاوہ توپخانے کا استعمال بھی کیا گیا۔

مقامی انتظامیہ کے مطابق فوج کو اطلاع ملی تھی کہ افغان سرحد کے قریب اس مقام پر فوج پر حملے کی تیاری کی جارہی ہے جس پر سکیورٹی فورسز نے مذکورہ ٹھکانے کو نشانہ بنایا۔

طالبان کے ترجمان کا شمالی وزیرستان میں بعض قبائلیوں کی جانب سے فوج کے ساتھ تعاون کے سلسلے میں کمیٹیاں تشکیل دینے کے فیصلے کے بارے میں کہنا تھا کہ ایسے افراد کو قتل کر دیا جائے گا۔ انہوں نے کہا کہ جس قبائلی نے بھی فوج کا ساتھ دینے کا اعلان کیا اس کا سر قلم کر دیا جائے گا۔

ایجنسی میں عیدک اور چند دوسرے مقامات پر مقامی قبائل نے اپنے علاقے کو لڑائی سے پاک رکھنے کی خاطر ایسی کمیٹیاں تشکیل دی تھیں جو اس بات کو یقینی بنانے کے لیے تھیں کہ ان کی زمین سے سکیورٹی فورسز پر حملے نہ ہوں۔

البتہ طالبان ترجمان کا کہنا تھا کہ عیدک کے قبائل سے رابطے پر انہوں نے یہ اعلان واپس لے لیا تھا۔

حکومت کے ساتھ جرگے کے ذریعے مذاکرات میں پیش رفت کے جواب میں ترجمان کا کہنا تھا کہ یہ عمل تعطل کا شکار ہے۔ جرگہ اراکین کی جانب سے حکومت پر پہلے حفاظتی چوکیاں ہٹانے کے مطالبے کے بعد سے ان مذاکرات میں بظاہر کوئی پیش رفت نہیں ہوئی ہے۔