ریاض سہیل بی بی سی اردو ڈاٹ کام، کراچی

	آئی جی جیلز کا کہنا تھا کہ ایڈز کی متاثرہ خواتین قیدی غیر ملکی اور سزا یافتہ ہیں

انسپکٹر جنرل جیل خانہ جات سندھ، محمد یامین خان نے ایک اعلامیے میں بتایا ہے کہ حال میں ہی صوبے بھر کی بیس جیلوں میں قیدیوں کے خون ٹیسٹ کرانے کی ہدایات جاری کی گئی تھیں جن کے نتائج کے بعد ہی ان قیدیوں کے اس مرض میں مبتلا ہونے کے بارے میں علم ہوا ہے۔

اعلامیے کے مطابق ان بیس جیلوں میں ستاون کے قریب قیدی منشیات کے عادی ہیں جو حیدرآباد، سکھر، لاڑکانہ، دادو اور کراچی کی بچوں کی جیل میں قید ہیں۔

آئی جی جیلز کا کہنا تھا کہ ایچ آئی وی ایڈز کے متاثر مریض قیدیوں میں چھ قیدی کراچی، تین ملیر اور تین کراچی کی خواتین جیل میں ہیں۔

ان کا کہنا تھا کہ ان مریضوں کی بیماری کے پیشِ نظر صوبائی محکمۂ صحت سے ان کے فوری اور سستے علاج کی درخواست کی گئی ہے، تاہم ان مریضوں کا علاج جیل میں ہو رہا ہے۔ آئی جی جیلز کا کہنا تھا کہ ایڈز کی متاثرہ خواتین قیدی غیر ملکی اور سزا یافتہ ہیں۔

انہوں نے بتایا کہ قیدیوں میں خارش اور سانس کی بیماریاں بھی عام ہیں اور وہ ذہنی دباؤ کم کرنے کے لیے زیادہ سگریٹ نوشی کرتے ہیں۔

جیل حکام کے مطابق اس وقت سندھ بھر کی جیلوں میں کوئی بیس ہزار کے قریب قیدی موجود ہیں جبکہ ان جیلوں میں قیدیوں کی گنجائش دس ہزار ہے۔