علی سلمان
بی بی سی اردو ڈاٹ کام، لاہور |  |
| | | حزب اختلاف صدر مشرف سے وردی چھوڑنے کا مطالبہ کر رہا ہے |
جمعرات کی صبح پاکستان میں الیکٹرانک میڈیا کے علاوہ پرنٹ میڈیا میں بھی سب سے نمایاں خبر ملک میں ایمرجنسی کے ممکنہ نفاذ کے بارے میں ہے اور تقریبا تمام قومی اخبارات نے اسی خبر کو شہ سرخی بنایا ہے۔ روزنامہ ’جنگ‘ کی شہ سرخی ہے ’ملک میں ایمرجنسی نافذ کرنے کافیصلہ، قومی اسمبلی کی مدت ایک سال بڑھ جائے گی۔‘ اسی خبر کے متن میں لکھا ہے کہ صوبائی اسمبلیوں کی مدت میں توسیع نہیں کی جاسکے گی، صدر کسی بھی صوبے میں گورنر راج نافذ کر سکیں گے، پارلیمنٹ کو بھی صوبائی قانون سازی کا اختیار مل جائے گا۔‘ جنگ اخبار کی ایک دوسری خبر ہے کہ’ایمرجنسی کے نفاذ میں ناکامی ہوئی تو مارشل لاء لگ جائے گا۔‘ روزنامہ ’نوائے وقت‘ کی لیڈ ہے کہ ’ایمرجنسی کے لیے حکومتی صلاح و مشورے، حالات موجود ہیں وزراء، آج مشرف کی زیر صدارت اجلاس ہوگا۔‘ خبر کےمتن میں مختلف وزراء کے بیانات دیے گئے ہیں۔ خبر کے مطابق وفاقی وزیر وصی ظفر نے ایمرجنسی کی باتوں کو بے بنیاد اور لغو قرار دیا ہے جبکہ دیگر دو وزراء شیرافگن اور طارق عظیم نے کہا ہے کہ ایمرجنسی لگائی جاسکتی ہے۔ روزنامہ ’ایکسپریس‘ کی لیڈ ہے کہ ’ایمرجنسی لگانے کا فیصلہ، سرکاری حلقوں کے کنفیوز بیانات، آج اہم اجلاس طلب۔‘ اسی اخبار نے یہ خبر دی ہے کہ ایمرجنسی کے لیے صدراتی فرمان تیار۔ روزنامہ ’آواز لاہور‘ کی تین کالم خبر ہے کہ ’سیاسی یتیم ایک سال سے ایمرجنسی لگانے کا مشورہ دے رہے ہیں، فیصلہ عدالتوں میں چیلنج کریں گے‘ بے نظیر۔‘ ’ڈان‘ اخبار نے خبردی ہےکہ صدر جنرل پرویز مشرف نے بدھ کو اپنے ساتھیوں سے ایک ملاقات کی ہے جس میں ملک میں ایمرجنسی کے نفاذ کے امکان سمیت موجود غیر یقینی سیاسی صورتحال سے نمٹنے کے طریقوں پر غور کیا گیا۔ اسی اخبار کی ایک دوسری خبرہے کہ ایمرجنسی لگ جانے کی اطلاعات کے بعد آدھی رات کو جڑواں شہروں اسلام آباد اور راولپنڈی میں سیکیورٹی کو اچانک ہائی الرٹ کردیا گیا اور دونوں شہروں میں قانون نافذ کرنے والے اداروں کے اہلکاروں پر مشتمل بھاری نفری تعینات کر دی گئی۔ روزنامہ ’پاکستان‘ نے چودھری شجاعت کے بیان کو لیڈ بنا دیا ہے۔ شہ سرخی ہے: ’ملک میں آج ایمرجنسی نافذ کردی جائےگی۔‘ روزنامہ ’خبریں‘ کی لیڈ ہے کہ ایمرجنسی نافذ کرنے کا فیصلہ، منظوری مشترکہ پارلیمنٹ دے گی۔‘ ’ڈیلی ٹائمز‘ نے تو خبر کے ساتھ صدر مشرف کے ٹی وی پر قوم سے باوردی خطاب کی ایک فائل فوٹو لگائی ہے اور سرخی جمائی ہے۔’میرے عزیز ہم وطنو۔‘ | 
ایمرجنسی کی افواہ، متضاد حکومتی اشارے
