عبدالحئی کاکڑ بی بی سی اردو ڈاٹ کام، پشاور

	راکٹ دو گھروں، ایک دکان اور ایک مسجد پر گرے

اطلاعات کے مطابق پہلے دو راکٹ داغے گئے جو ایک مکان پر گرے۔ اس واقعہ کے بعد پولیس اور عام شہری وہاں جمع تھے کہ دو اور راکٹ آ گرے۔

اس واقعے میں کم سے کم پینتیس افراد زخمی بھی ہوئے ہیں جن میں چند پولیس اہلکار بھی بتائے جاتے ہیں جو موقع پر موجود تھے۔

ہسپتال کے ذرائع کے مطابق زخمیوں میں سے زیادہ تر کی حالت تشویشناک ہے۔

خبر رساں ادارے ایسوسی ایٹڈ پریس نے ایک پولیس آفیسر خواجہ محمد کے حوالے سے بتایا کہ راکٹ دو گھروں، ایک دکان اور ایک مسجد پر گرے۔

جنوبی اضلاع میں پہلے بھی راکٹوں سے حملے ہوئے ہیں لیکن کسی نے ذمہ داری قبول نہیں کی اور نہ پولیس نے کسی کو نامزد کیا ہے لیکن حکام سے جب بات ہوتی ہے تو وہ مقامی طالبان کا نام لیتے ہیں۔

واضح رہے کہ قبائلی علاقوں کے بعد صوبہ سرحد کے جنوبی اضلاع میں طالبانائزیشن کی ایک لہر آئی ہے جس کا حکومت بھی اعتراف کرتی ہے اور ان علاقہ جات میں راکٹ حملے، سکیورٹی دستوں پر حملے اور اغواء کے واقعات عام سی بات ہوگئے ہیں۔