ہارون رشید اسلام آباد

	شمالی وزیرستان میں طالبان کی جانب سے حکومت کو فوجی چوکیاں ختم نہ کرنے کے معاملے پر دی گئی ڈیڈ لائن سے حالات غیر یقینی ہوگئے ہیں

اس کے علاوہ مقامی طالبان نے واضع کیا کہ ہے گوریلا کارروائیوں کے علاوہ قبائلیوں پر حکومت سے رابطوں اور تعاون جیسی کئی پابندیاں بھی عائد کی جائیں گی۔

شمالی وزیرستان میں طالبان کی جانب سے حکومت کو فوجی چوکیاں ختم نہ کرنے کے معاملے پر دی گئی ڈیڈ لائن سے ایک مرتبہ پھر حالات غیر یقینی ہوگئے ہیں۔ اگر حکومت کی جانب سے ستمبر میں طے پانے والے امن معاہدے کو بچانے کی کوشش نہ کی گئی تو حالات کافی سنگین صورت اختیار کر سکتے ہیں۔

مقامی طالبان کے سربراہ عبداللہ فرہاد نے بی بی سی سے بات کرتے ہوئے بتایا کہ ڈیڈلائن کے اعلان کے باوجود حکومت کی جانب سے ان سے رابطے کی ابھی تک کوئی کوشش نہیں کی گئی ہے۔

	جنوبی وزیرستان کے قبائل کی طالبان کے لیے حمایت حکومت کے لیے مشکلات پیدا کر سکتی ہے

انہوں نے کہا کہ پندرہ جولائی کے بعد گوریلا جنگ کے علاوہ مقامی قبائلیوں پر ایک مرتبہ پھر حکومت سے رابطوں پر پابندی ہوگی، خاصہ داروں سے اپیل ہوگی کہ وہ اپنی نوکریاں چھوڑ دیں ورنہ وہ بھی فوج کی طرح ان کا ہدف ہوں گے اور جو قبائلی اپنی گاڑیوں میں فوج کو پانی وغیرہ فراہم کرتے ہیں ان پر بھی پابندی ہوگی۔

عبداللہ فرہاد کا کہنا تھا کہ لال مسجد کے واقع نے واضع کر دیا ہے کہ حکومت دہشت گردی کا خاتمہ نہیں بلکہ مسلمانوں اور بچوں کا خاتمہ چاہتی ہے۔

تاہم شمالی وزیرستان کے طالبان کی یہ بات کہ اس جنگ میں جنوبی وزیرستان کے قبائل بھی ان کے ساتھ ہوں گے حکومت کی مشکلات میں مزید اضافے کا سبب بن سکتی ہے۔

تاہم ترجمان نے واضع کیا کہ میران شاہ میں کل کے مبینہ خودکش حملے سے ان کا کوئی تعلق نہیں اور یہ انہیں بدنام کرنے کی ایک کوشش تھی۔ ان کا کہنا تھا کہ اگر ضرورت پڑی تو وہ کارروائیوں کا اعلان پندرہ کے بعد کریں گے۔