دلاور خان وزیر بی بی سی اردو ڈاٹ کام، ڈیرہ اسماعیل خان

	تین خود کش حملہ آوروں کی اکٹھے گرفتاری کا یہ پہلا واقعہ ہے

پولیس کے ایک افسر رب نواز نے بی بی سی کو بتایا کہ پولیس کو حفیہ ذرائع سے اطلاعات ملی تھیں کہ صدر تھانہ کی حدود میں واقع ایک زیر تعمیر مکان میں تین مشکوک لوگ چھپے ہوئے ہیں اور وہاں ایک کار بھی ہے۔

پولیس نے بھاری نفری کے ساتھ اس مکان پر چھاپہ مارا۔ پولیس کے مطابق چھاپے کے دوران تین خودکش حملہ آوروں کوگرفتار کرلیا گیا۔ پولیس افسر نے مزید بتایا کہ موٹر کار بھی مکمل طور پر بارود سے بھری ہوئی تھی۔

پولیس افسر کے مطابق موٹر کار پر ملتان کی نمبر پلیٹ لگی ہوئی ہے۔ ان کا کہنا تھا کہ خودکش حملہ آوروں میں سے دو کا تعلق شمالی وزیرستان کی تحصیل میرعلی سے ہے اور ایک کا تعلق ڈیرہ اسماعیل خان کے تحصیل کلاچی سے ہے۔

اس پہلے بھی دو بار ڈیرہ اسماعیل خان اور ٹانک میں اسلحہ سے بھری ہوئی گاڑیوں کو پولیس نے پکڑا تھا لیکن یہ اپنی نوعیت کا پہلا واقعہ ہے جس میں ایک ساتھ تین خودکش حملہ آوروں پکڑے گئے ہیں۔