نثار کھوکھر بی بی سی اردو ڈاٹ کام سکھر

	دو ہزار دو کے بعد سینٹرل جیل سکھر میں یہ پہلی پھانسی ہے۔ (فائل فوٹو)

مقامی جوڈیشل مجسٹریٹ اور جیل ڈاکٹر کی موجودگی میں جیل عملے نے لیور کھینچ کر شہزادو منگی کو پھانسی دے دی۔ جیل سپرنٹنڈنٹ ملک الطاف اعوان نے بی بی سی کو بتایا ہے کہ قیدی شہزادو منگی کا بلیک وارنٹ پندرہ دن قبل موصول ہوچکا تھا۔

قیدی کی لاش ان کے بڑے بھائی شبیر منگی نے وصول کی۔ان کے ورثاء کی بڑی تعداد اس موقع پر جیل کے باہر موجود رہی۔ قیدی شہزادو منگی کے والد نبی بخش نے بی بی سی کو بتا یا ہے کہ انہوں نے کرنل بلال کے ورثاء سے معافی کے لیے انہوں نے آٹھ بار رابطہ کیا۔ ان کا کہنا تھا کہ وفاقی وزیر اعجازالحق کی معرفت وہ صلح کے لیے راضی ہوچکے تھے مگر اعجازالحق تھائی لینڈ دورے پر چلے گئے
اور ان کے پاس وقت بہت کم ہوگیا۔

دو ہزار دو کے بعد سینٹرل جیل سکھر میں یہ پہلی پھانسی ہوئی ہے۔

بیالیس سالہ قیدی شہزادو منگی کے ورثاء نے بدھ کے دن ان سے آخری ملاقات کی ۔ شہزادو منگی ضلع گھوٹکی کے رہائشی ہیں۔ انہیں کراچی کے بریگیڈ تھانہ حدود میں کرنل بلال قتل مقدمہ میں انیس سو اٹھانوے میں گرفتار کیا گیا تھا۔

انسداد دہشت گردی کی ایک عدالت نے شہزادو منگی کو انیس سو ننانوے میں پھانسی کی سزا سنائی تھی۔ انہوں نے پھانسی کی سزا کے خلاف سندھ ہائی کورٹ اور سپریم کورٹ میں اپیلیں دائر کیں۔ صدر پاکستان کو بھی انہوں نے رحم کی اپیل کی مگر ان کی پھانسی کی سزا برقرار رہی۔

جیل حکام کے مطابق انیس اکتالیس میں بنی سکھر سینٹرل جیل میں اب تک دو سو تریسٹھ قیدیوں کو پھانسی دی گئی ہے۔