علی سلمان بی بی سی اردو ڈاٹ کام، لاہور

	’سوال یہ اٹھتا ہے کہ پر تشدد مناظر ٹی وی پر دکھائے بھی جانے چاہیں یا نہیں؟‘

رحیم یار خان کے تھانہ اے ڈویژن میں ڈیوٹی پر موجود پولیس اہلکار فدا حسین نے محلہ قاضیاں کے مبشر علی کی ’پھانسی کے کھیل‘ میں ہلاکت کی تصدیق کرتے ہوئے بتایا کہ بچے نے گلے میں پھندا خود ڈالا تھا۔

مبشر علی اپنی بہن اور بھائی کے ساتھ مل کر کھیل رہے تھے۔ ان بچوں نے معزول عراقی صدر صدام حسین کی پھانسی کا منظر ٹی وی پر دیکھا تھا، جس میں بار بار ان کے گلے میں پھانسی کا پھندا پہناتے ہوئے دکھایا جا رہا تھا۔

اہلخانہ کے مطابق چوتھی جماعت کے طالبعلم مبشر نے گھر کی چھت پر رکھی پیکنگ میں استعمال ہونے والی نائلون کی رسی کا پھندا بنا کر گلے میں ڈالا اور خود سے ایک برس بڑی اپنی بہن اور پانچ برس چھوٹے بھائی کے ساتھ صدام حسین کی پھانسی کا کھیل کھیلنے لگا۔

پھانسی ایسے دی گئی  بچے نے اپنی ماں کو گلے میں پڑی نائیلون کی رسی دکھا کر کہا کہ صدام کو اس طرح پھانسی دی گئی ہے صحافی عبدالخالق شاکر

مقامی صحافی عبداخالق شاکر نے کہا کہ بچے کے اہلخانہ نے انہیں بتایا کہ بچے نے اپنی ماں کو گلے میں پڑی نائلون کی رسی دکھا کر کہا کہ صدام کو اس طرح پھانسی دی گئی ہے۔

ان کے مطابق ماں بچےکو منع کرنے کے لیے اٹھی لیکن اس دوران سیڑھی پرکھڑے بچے کا توازن بگڑ گیا اور وہ گر کر جھولنے لگا کیونکہ نائلون کی ڈوری کا ایک سرا سیڑھیوں کی گرِل سے بندھا ہوا تھا۔ موقع پر موجود ماں اور پھوپھی کے پہنچنے سے پہلے ہی مبشر دم توڑ گئے۔

مبشر کی نماز جنازہ اس سکول کے گراونڈ میں پڑھائی گئی جہاں وہ زیر تعلیم تھے۔ عید کے روز بچے کے گھر افسوس کے لیے آنے والوں کا تانتا بندھا رہا۔

اس بچے کی موت سے یہ سوال ضرور اٹھے گا کہ صحافتی اخلاقیات اور ذمہ داریوں کے لحاظ سے کسی کو پھانسی دیئے جانے کے مناظر ٹی وی پر دکھائے جانا کیا ایک درست اقدام تھا؟