علی سلمان بی بی سی اردو ڈاٹ کام لاہور

	سپریم کورٹ نے ماں کے خط پر تحقیقات کا حکم دیا

سپریم کورٹ کے فل بنچ نے اس مقدمے کی سماعت ضلع شیخوپورہ کے علاقے مانانوالہ کی خاتون ممتاز بی بی کے چیف جسٹس افتخار چودھری کو لکھے ایک خط پر شروع کی تھی۔ اس خط میں خاتون نے کہا ہے کہ ان کے کم عمر بیٹے سعید احمد کو اغوا کرکے قتل کر دیا گیا تھا۔

خاتون نے اپنے خط میں علاقے سے غائب آٹھ دیگر بچوں کے نام بھی دیے اور کہا کہ ان تمام کو مبینہ طور پر اغوا کرکے قتل کیا گیا۔انہوں نے بچوں کے اغوا کا مقصد ان کے جسمانی اعضاء گردے اور دل نکال کر فروخت بیان کیا۔

انہوں نے اپنے خط میں کہا کہ ان کے بیٹے کو قتل ہوئے ڈھائی سال ہوگئے لیکن پولیس نے مقدمہ درج کیا اور نہ ہی نامزد ملزم کے خلاف کارروائی کی۔ چیف جسٹس نے ازخود نوٹس لیکر اس خط کو درخواست میں تبدیل کیا اور شیخوپورہ پولیس سے رپورٹ طلب کی تھی۔

پولیس نے ڈھائی سال کی تاخیر کے بعد ابتدائی اطلاعاتی رپورٹ یعنی ایف آئی آر درج کرنے کے بعد جمعرات کو اس نئے مقدمہ سے متعلق ریکارڈ عدالت میں جمع کرایا۔

اس ریکارڈ میں ملزم شہزاد کا وہ بیان بھی شامل تھا جو پولیس کی حالیہ تفتیش میں قلمبند کیا گیا۔ اس بیان کے مطابق ملزم شہزاد نے مبینہ طور پر اعتراف کیا ہے کہ اس نے پچیس لڑکوں کے جسمانی اعضا فروخت کرنے کی خاطر انہیں اغوا کرکے قتل کیا۔

پولیس نے عدالت کو اس بات سے بھی آگاہ کیا کہ ملزم لاہور سے ایک بچے کے اغوا کے مقدمے میں پہلے سے گرفتار تھا اور پولیس نے اسے جیل لاکر جسمانی ریمانڈ پر اپنی تحویل میں لیا ہے جہاں اس نے مبینہ طور پر مذکورہ بیان میں پچیس بچوں کے اغوا کا انکشاف کیا ہے۔

سپریم کورٹ کے چیف جسٹس نے ریمارکس دیے کہ ’ڈھائی سال پہلے اتنا بڑا واقعہ ہوا اور پولیس نے نوٹس تک نہیں لیا اور اب اتنی تاخیر سے مقدمہ درج کیا گیا ہے کہ طبی شواہد ضائع ہوچکے ہوں گے۔‘ انہوں نے کہا کہ کیس خراب ہونے کی ذمہ داری پولیس پر ہے۔

سپریم کورٹ نے شیخوپور کے ضلعی پولیس افسر کو ہدایت کی ہے کہ وہ پندرہ یوم کے اندر اس معاملے کی تفتیش مکمل کرکے عدالت میں پیش کریں۔

واضح رہے کہ پاکستان میں اس سے پہلے سو بچوں کے قتل کا ایک سکینڈل اس وقت سامنے آیا تھا جب بچوں کے مبینہ قاتل جاوید اقبال نے خود پولیس کو اس کی اطلاع دی تھی۔ جاوید اقبال بعد میں جیل میں پراسرار حالات میں ہلاک ہوگیا تھا۔