احمد رضا بی بی سی اردو ڈاٹ کام، اسلام آباد

	درجۂ حرارت میں اضافہ طوفانوں کے بار بار آنے کا سبب ہے

پہلا طوفان پانچ جون کو آیا جس نے پہلے خلیجی ریاست عمان، پھر ایران اور اس کے بعد پاکستان میں گوادر کے ساحلی علاقوں میں تباہی مچائی۔ اس طوفان کوگونو کا نام دیا گیا تھا اور کہا جا رہا ہے کہ خطے میں پچھلے 60 سالوں میں آنے والا یہ سب سے زیادہ طاقتور سمندری طوفان تھا۔

اور اب پچھلے چند دنوں سے بحیرہ عرب میں ایک اور طوفان برپا ہے، جو بھارتی ریاست گجرات کے بعد سندھ اور بلوچستان کے ساحلی علاقوں میں طوفانی ہواؤں اور شدید بارشوں کا سبب بن رہا ہے۔ اپنی آمد سے قبل ہی اس طوفان نے کراچی میں دو سو سے زائد افراد کی جان لے لی۔

سمندری طوفانوں کے یوں یکے بعد دیگرے آنے کے بارے میں موسمی تغیرات کی ایک ماہر صفیہ شفیق کہتی ہیں کہ درجۂ حرارت میں اضافہ طوفانوں کے بار بار آنے اور ان کی شدت میں اضافے کا ایک سبب ہے۔

سونامی کا سبق  سونامی کے بعد سری لنکا اور انڈونیشیا سمیت بہت سے متاثرہ ممالک نے اس بات کو محسوس کیا کہ انہوں نے بڑے پیمانے پر تمر کے جنگلات کا صفایا کر کے قدرتی آفات کے لیے راستہ ہموار کیا طاہر قریشی

وہ کہتی ہیں کہ طوفان تو اس علاقے میں آتے رہے ہیں لیکن پچھلے چند سالوں میں دیکھا گیا ہے کہ ان کی تعداد کے ساتھ ساتھ شدت بھی بڑھ گئی ہے، جو کہ عالمی حدت میں اضافے کا ایک منطقی نتیجہ ہے۔

عالمی حدت اور درجۂ حرارت بڑھنے کی وجہ بتاتے ہوئے صفیہ شفیق نے کہا کہ گرین ہاؤس گیسز جو کوئلہ، تیل اور دوسری ہائیڈروکاربن مصنوعات کے جلنے سے پیدا ہوتی ہیں، وہ زمین کے اطراف خلاء میں جمع ہو رہی ہیں جس کی وجہ سے سورج کی حدت بھی زمین کے گرد جمع ہوجاتی ہے اور وہاں سے باہر نکل نہیں پاتی۔ نتیجتاً زمین پر ہوا کا درجہ حرارت بڑھ رہا ہے اور موسموں میں تبدیلی پیدا ہورہی ہے۔

ساحلی علاقوں میں پھیلے ہوئے تمر کے خود رو قدرتی جنگلات (mangrove)مچھلیوں، جھینگوں اور کیکڑوں کی افزائش کا ذریعہ تو ہوتے ہی ہیں لیکن یہ سمندری طوفانوں کے خلاف قدرتی حفاظتی دیوار کا کام بھی کرتے ہیں۔

ساحلی ماحولیاتی نظام کے ماہر طاہر قریشی کہتے ہیں ’ہم لوگ تمر کے جنگلات جتنے کاٹ رہے ہیں اس سے اتنا ہی قدرتی آفات کے اثرات بڑھ رہے ہیں۔ قدرتی نظام کو چھیڑا جائے گا تو قدرت جوابی کارروائی کرے گی۔‘

	جنگلات سمندری طوفانوں کے خلاف قدرتی حفاظتی دیوار کا کام بھی کرتے ہیں

طاہر قریشی بتاتے ہیں کہ دریائے سندھ کے ڈیلٹا میں ایک زمانے میں چھ لاکھ ہیکٹرز پر تمر کے جنگلات پھیلے ہوئے تھے اور یہ اتنے گھنے تھے کہ اس میں انڈس ٹائیگر اور آئی بیکس بھی پائے جاتے تھے، لیکن دریا میں پانی کی قلت اور دوسرے اسباب کے نتیجے میں یہ جنگلات کم ہوتے چلے گئے اور اب یہ صرف 80 تا 85 ہزار ہیکٹرز کے علاقے میں رہ گئے ہیں۔

انہوں نے کہا کہ کراچی کے ساحلی علاقوں میں ترقیاتی منصوبوں کے لیے بھی تمر کے جنگلات کو ختم کیا گیا۔

طاہر قریشی کہتے ہیں کہ سونامی کے بعد سری لنکا اور انڈونیشیا سمیت بہت سے متاثرہ ممالک نے اس بات کو محسوس کیا کہ انہوں نے بڑے پیمانے پر تمر کے جنگلات کا صفایا کر کے قدرتی آفات کے لیے راستہ ہموار کیا۔ ’یہ ممالک اب بڑے پیمانے پر تمر کی شجرکاری کر رہے ہیں تاکہ آئندہ سونامی یا اس جیسی قدرتی آفات کے اثرات کو کم کیا جا سکے‘۔