ریاض سہیل بی بی سی اردو ڈاٹ کام کراچی

	طوفان کے خطرے کے پیش نظر کراچی، بدین اور ٹھٹہ میں ماہی گیروں کی لانچیں کھڑی کردی گئی ہیں

محکمہ موسمیات کا کہنا ہے کہ طوفان کا مرکز کراچی سے ساڑھ چار سو کلومیٹر دور جنوب میں ہے اور یہ طوفان انڈیا کی ریاست گجرات کی طرف بڑھ رہا ہے۔

محکمے کی جانب سے جاری کی گئی وارننگ میں بتایا گیا ہے کہ آئندہ بارہ گھنٹے میں ستر سے نوے کلومیٹر رفتار کی تیز ہواؤں کے ساتھ شدید بارشوں کا امکان ہے۔ کراچی سمیت زیریں سندھ بھی اس کی لپیٹ میں ہے۔

ماہی گیروں پر آئندہ چوبیس گھنٹوں میں مچھلی کے شکار کے لیئے کھلے سمندر میں جانے کی پابندی لگا دی گئی ہے جس کے بعد کراچی، بدین اور ٹھٹہ میں ماہی گیروں کی لانچیں کھڑی کردی گئی ہیں۔

طوفانی بارشوں کے اطلاع کے بعد ٹھٹہ اور بدین اضلاع میں ہنگامی حالات کا اعلان کیا گیا ہے۔ ضلعی انتظامیہ کی جانب سے ایمرجنسی ریلیف کیمپ قائم کردیے گئے ہیں۔ساحل کے قریب بستیوں سے لوگوں کو محفوظ مقامات پر منتقل ہونے کی ہدایت کی گئی ہے۔

واضح رہے کہ تین سال قبل بھی شدید طوفان سے بدین اور ٹھٹہ میں بہت جانی اور مالی نقصان ہوا تھا۔