ریاض سہیل بی بی سی اردو ڈاٹ کام، کراچی

دیواریں گرنے سےگھروں کے باہر کھڑی متعددگاڑیاں بھی تباہ ہوئیں

عوامی مقامات پر تحفظ کس کی ذمہ داری ہے؟

کراچی میں طوفان بادو باراں کی ویڈیو

کراچی میں طوفان، ہلاکتیں

کراچی میں طوفان اور ہلاکتیں، آپ کا رد عمل

مرتضیٰ بلوچ نے کہا کہ گورنر سندھ نے کہا تھا کہ اس علاقے میں مدد بھیجی جائے گی لیکن ایسا کچھ نہیں ہوا۔

اس سے قبل گورنر سندھ عشرت العباد نے بی بی سی اردو سروس سے بات کرتے ہوئے کہا تھا کہ ہلاک ہونے والوں کے ورثاء اور زخمیوں کو فوری طور پر معاوضہ دیا جائے گا۔ انہوں نے کہا تھا کہ شہر کی سڑکوں سے ملبہ طوفان کے بعد فوری طور پر ہٹا دیا گیا تھا۔

دریں اثناء بارشوں میں سائن بورڈ گرنے سے ہلاکتوں کے بعد حکومت نے شہر بھر میں آویزاں بڑے سائن بورڈ ہٹانے کا فیصلہ کیا ہے اور کہا کہ اس پر فوری عمل کیا جائیگا، دوسری جانب شہر میں کے ای ایس سی کے تمام تر دعوؤں کے باوجود کئی علاقوں میں بجلی کی فراہمی بحال نہیں ہوسکی ہے۔

گورنر نے بی بی سی کو بتایا کہ بڑے بڑے ہورڈنگ ہٹانے کا فیصلہ گزشتہ سال بھی کیا گیا تھا۔

اس سے قبل ایدھی فاؤنڈیشن کے چیف رضاکار رضوان ایدھی نے بی بی سی اردو کو بتایا تھا کہ اتوار کی صبح تک ایدھی کے سرد خانے میں ایک سو پندرہ لاشیں پہنچائی گئی ہیں جن میں زیادہ تر طوفانِ باد و باراں کے دوران ہلاک ہوئے ہیں۔

	شہر میں دس سے سترہ ملی میٹر بارش ریکارڈ کی گئی

رضوان ایدھی کا کہنا تھا کہ یہ افراد دیواریں، سائن بورڈ اور درخت گرنے، کرنٹ لگنے اور سڑک حادثات میں ہلاک ہوئے جبکہ کچھ طبعی اموات بھی ہوئی ہیں۔ انہوں نے بتایا کہ یہ لاشیں شہر کے مختلف علاقوں، ہسپتالوں سے پہنچائی گئی ہیں جن میں کئی لاوارث بھی ہیں۔

اس طوفان میں زخمی ہونے والے دو سو سے زائد افراد کو، جن میں عورتیں اور بچے بھی شامل ہیں جناح، سول ، عباسی شہید اور سعود آباد ہسپتالوں میں داخل کروایا گیا تھا اور ان میں ہنگامی حالت نافد کر دی گئی تھی۔

ہورڈنگز سٹی حدود میں نہیں گرے سٹی حکومت کی حدود میں کوئی بھی ہورڈنگز نہیں گرا جتنے بھی ہورڈنگز گرے ہیں وہ تمام کینٹونمنٹ کے علاقوں میں گرے ہیں سٹی ناظم مصطفیٰ کمال

سٹی ناظم مصطفیٰ کمال کا کہنا ہے کہ کراچی میں تیرہ ادارے ہیں جو شہر کا نظام چلا رہے ہیں اور وہ ان تمام کے بارے میں فیصلہ کرنے کا اختیار نہیں رکھتے۔

ان کا کہنا تھا کہ سٹی حکومت نے ایک قانون پاس کیا تھا جس کے تحت سٹی حکومت کی حدود میں لگائی گئیں ہورڈنگس کا سائز کم کیا گیا اور سال بھر میں بتیس بڑی ہورڈنگز گرا دی گئیں۔

	گزشتہ روز کی طوفانی بارش کے دوران یہ سائن بورڈ یا تو راہ گیروں پر گرے یا بجلی اور ٹیلی فون کی تاروں پر

ان کا کہنا تھا کہ بارش کے دوران سٹی حکومت کی حدود میں کوئی بھی ہورڈنگز نہیں گرا جتنے بھی ہورڈنگز گرے ہیں وہ تمام کینٹونمنٹ کے علاقوں میں گرے ہیں۔

کراچی میں سنیچر کو سارا دن سخت گرمی اور گھٹن کے بعد شام کو ساڑھے چار بجے تیز ہواؤں کے ساتھ بارش کا سلسلہ شروع ہوا تھا۔ ہوا اس قدر شدید تھی کہ کئی مقامات پر درخت، بجلی اور ٹیلیفون کے کھمبے اکھڑ کر سڑکوں پر آگرے، اس کے علاوہ بڑے سائن بورڈ بھی زمین بوس ہوگئے تھے۔

محکمۂ موسمیات نے مزید شدید بارش کی پیشگوئی کی تھی۔ سندھ اور بلوچستان کے ماہی گیروں کوگہرے سمندر میں نہ جانے کا مشورہ دیا گیا ہے۔