ریاض سہیل بی بی سی اردو ڈاٹ کام، کراچی

	آئندہ اڑتالیس گھنٹوں میں مزید شدید بارش کی پیشین گوئی کی گئی ہے

کراچی میں سنیچر کو سارا دن سخت گرمی اور گھٹن کے بعد شام کو ساڑھے چار بجے تیز ہواؤں کے ساتھ بارش کا سلسلہ شروع ہوا۔ ہوا اس قدر شدید تھی کہ کئی مقامات پر درخت، بجلی اور ٹیلیفون کے کھمبے اکھڑ کر سڑکوں پر آگرے، اس کے علاوہ بڑے سائن بورڈ بھی زمین بوس ہوگئے۔

بارش کے دوران درخت، سائن بورڈ اور گھر کی دیواریں گرنے سمیت کرنٹ لگنے سے کم سے کم چوالیس افراد ہلاک ہوگئے ہیں جن میں خواتین اور بچے بھی شامل ہیں اور دو سو سے زائد زخمی ہیں، جو جناح، سول ، عباسی شہید اور سعود آباد ہسپتالوں میں زیر علاج ہیں۔ سر پر چوٹ لگنے کی وجہ سے کئی کی حالت تشویشناک ہے۔

صرف کراچی کے مضافاتی علاقہ گڈاپ کے مقام پر تیرہ افراد ہلاک ہوئے۔

صوبائی وزیر صحت سردار احمد نے ان ہلاکتوں کی تصدیق کرتے ہوئے بتایا کہ شہر بھر کی ہسپتالوں میں ایمرجنسی نافذ ہے اور تمام ڈاکٹر اور سٹاف موجود ہے۔

محکمۂ موسمیات کا کہنا ہے کہ شہر میں دس سے سترہ ملی میٹر بارش ریکارڈ کی گئی ہے۔ محکمۂ موسمیات نے آئندہ اڑتالیس گھنٹوں میں مزید شدید بارش کی پیشین گوئی کی ہے۔ سندھ اور بلوچستان کے ماہی گیروں کوگہرے سمندر میں نہ جانے کا مشورہ دیا گیا ہے۔

بارش کی وجہ سے موصلات کا نظام درہم برہم ہوگیا، درخت اور سائن بورڈ گرنے سے شاہراہ فیصل، آئی آئی چندریگر روڈ سمیت کئی سڑکوں پر ٹریفک جام ہوگیا۔

	شدید بارش سے کچھ علاقوں میں ٹریفک جام ہو گیا

بارش ہوتے ہی شہر اندھیرے میں ڈوب گیا تھا کیونکہ ستر فیصد گرڈ سیٹشن ٹرپ ہوگئے ہیں۔ کراچی الیکٹرک سپلائی کارپوریشن کا کہنا ہے کہ باون میں سے پینتیس گرڈ اسٹیشن ٹرپ ہوگئی ہیں۔ کے ای ایس سی کے ترجمان سید سلطان کا کہنا ہے کہ تاروں پر سائن بورڈ اور درخت گرنے سے بجلی کی فراہمی متاثر ہوئی ہے۔

شہر سے ملحقہ دیہات اور کچی آبادیاں بارش کے بعد زیر آب آگئی ہیں۔اندرون سندھ حیدرآباد، ٹھٹہ، بدین، تھرپارکر اور دیگر علاقوں میں بھی بارش کی اطلاعات ہیں۔