رفعت اللہ اورکزئی بی بی سی اردو ڈاٹ کام، پشاور

	صوبے کے کئی علاقوں سے نقصان کی اطلاعات نہیں مِل سکیں

صوبہ سرحد کے مختلف شہروں سے ملنے والی اطلاعات کے مطابق جمعہ کی سپہر اچانک شدید بارشوں اور ہوآؤں کا سلسلہ شروع ہوگیا۔ اچانک آنے والے طوفان نے سب سے زیادہ تباہی صوبہ سرحد کے شمالی شہر سوات میں مچائی جہاں سرکاری ذرائع کے مطابق گھروں کی چھتیں گرنے اور دیگر واقعات میں دس افراد جان بحق ہوچکے ہیں جبکہ ساٹھ سے زائد زخمی ہوئے ہیں۔

سوات کے تمام ہسپتالوں میں ایمرجنسی نافذ کردی گئی ہے جبکہ طوفان میں شدید زخمی ہونے والوں کو پشاور منتقل کیا گیا ہے۔ درگئی اور سخاکوٹ کے علاقوں میں بھی طوفان سے کئی گھر گر گئے ہیں جس میں درجنوں افراد کے زخمی ہونے کی اطلاعات ہیں۔

ہری پور مانسہرہ سے ملنے والی اطلاعات میں بتایا گیا ہے کہ شدید آندھی اور طوفان کے بعد درجنوں مکانوں کی چھتیں اڑگئیں جس کے نتیجے میں اٹھ افراد ہلاک اور متعدد زخمی ہوگئے۔

مقامی لوگوں کا کہنا ہے کہ آندھی کی شدت اتنی زیادہ تھی کہ سینکڑوں درخت، سائن بورڈ اور زلزلے سے متاثرہ علاقوں میں خیمہ بستیاں اڑگئی۔ پشاور اور گرد و نواح کے علاقوں میں بھی شدید آندھی اور طوفان سے ایک شخص ہلاک اور چالیس سے زائد زخمی ہوئے ہیں۔

واپڈا حکام کے مطابق درجنوں مقامات پر بجلی کے کھمبے اور تاریں گرگئیں ہیں جن کی مرمت کاکام جاری ہے۔ مواصلاتی نظام درہم برہم ہونے کی وجہ سے کئی علاقوں سے جانی و مالی نقصانات کے بارے میں فوری طورپر معلوم نہیں ہوسکا۔
پشاور میں محکمہ موسمیات کی طرف سے آئندہ چوبیس گھنٹوں میں مزید بارش کی پیشنگوئی کی گئی ہے۔