ہارون رشید، ذوالفقار علی بی بی سی اردو ڈاٹ کام

	شدید بارشوں اور برف باری کی وجہ سے لوگ مشکلات کا شکار ہیں

پاکستان کے زیرِ انتظام کشمیر کے دار الحکومت مظفرآباد کے قریب ایک حادثے میں چار کشمیری انجینئرز سمیت پانچ افراد ہلاک ہوگئے ہیں۔

بارشوں کے اس تازہ سلسلے نے شمالی و قبائلی علاقاجات اور صوبہ سرحد میں کئی پہاڑی علاقوں کا سڑکوں کے ذریعے رابطہ منقطع کر دیا ہے۔ ٹریفک کے معطل ہونے سے عام لوگوں کو شدید مشکلات کا سامنا کرنا پڑا ہے۔

انسانی جان کے نقصان کا سب سے بڑا واقعہ قبائلی علاقے باجوڑ ایجنسی میں پیش آیا جہاں ایک ہی خاندان کے چھ افراد مکان کی چھت گرنے سے ہلاک ہوگئے۔ ماموند کے گاؤں خراڑی ماموند کے غلام جان کے مکان کی چھت گرنے سے ان کی چالیس سالہ اہلیہ، تین بیٹے اور دو بیٹیاں ہلاک ہوئے جبکہ وہ خود زخمی ہو گئے۔

وادی سوات میں بھی زمینی راستے کٹ گئے ہیں جبکہ بڑی تعداد میں مکانات کو بھی نقصان پہنچا ہے۔

اکثر پہاڑی علاقوں میں برف باری بھی ہو رہی ہے جس سے سردی کی شدت میں اضافہ ہوا ہے۔

پاکستانی کے زیرِ انتظام کشمیر میں چار انجینئرز اپنے ڈرائیور کے ہمراہ گزشتہ شب راولپنڈی سے مظفرآباد آ رہے تھے۔ شہر کے قریب ایک پہاڑی سے بڑا پتھر گاڑی پر آ گرا اور گاڑی ڈ رائیور کے قابو سے باہر ہو کر دریا ئے جہلم میں جا گری ۔ جس کے نتیجے میں پانچوں افراد سمیت ہلاک ہو گئے۔

پاکستان کے زیرِ انتظام کشمیر میں کئی روز سے بارشیں اور برف باری ہورہی ہے۔ بیشتر علاقوں میں تود ے گرنے کی وجہ سے کئی سڑکیں بند ہو گئی ہیں جس کے باعث لوگوں کو آمد و رفت میں خاصی مشکلات پیش آرہی ہیں۔