عبدالحئی کاکڑ بی بی سی اردوڈاٹ کام، پشاور

	عدالت نے صوبہ سرحد کےایڈووکیٹ جنرل سے رپورٹ طلب کی ہے

اس کیس کی سماعت پشاور ہائی کورٹ کےجسٹس قائم جان اور جسٹس جہانزیب خان پر مشتمل ایک بنچ کر رہا ہے۔ عبدالرحیم مسلم دوست کے وکیل فضل الہی نے بنچ کو بتایا کہ انکے مؤکل کو خفیہ ایجنسیوں نے پہلے پشاور میں پولیس کے حوالے کرنے کی کوشش کی تاکہ انکے خلاف کوئی مقدمہ دائر کیا جاسکے لیکن بقول انکے پولیس نے مقدمہ درج کرنے سے انکار کردیا۔

انہوں نے عدالت کو بتایا کہ اس کے بعد خفیہ ایجنسی کے اہلکاروں نےعبدالرحیم مسلم دوست کو قبائلی علاقے خیبر ایجنسی کے پولٹیکل ایجنٹ کے حوالے کردیا جہاں وہ اب زیر حراست ہیں۔

	لاپتہ افراد کےمعاملے کی سماعت سپریم کورٹ میں جاری ہے

فضل الہی کا کہنا تھا کہ انکے مؤکل کے بھائی سید محمد نے ان سے ملاقات بھی کی ہے۔ دلائل سننے کے بعد عدالت نے صوبہ سرحد کے ایڈشنل ایڈوکیٹ جنرل خوشدل خان کو یہ حکم جاری کردیا کہ وہ اگلی پیشی کے دوران اس سلسلے میں عدالت کے سامنے اپنی رپورٹ پیش کر دیں۔

افغان صحافی نے القاعدہ اور طالبان سے تعلق رکھنے کے شبہ میں ڈھائی سال گوانتانامو بے میں گزارے تھے مگر انہیں گزشتہ سال رہا کردیا گیا تھا۔ رہائی کے بعد انہوں نے’گوانتانامو کی شکستہ زنجیروں‘ کے عنوان سے ایک کتاب لکھی تھی جس میں پاکستان کے خفیہ ادارے آئی ایس آئی کو بھی سخت تنقید کا نشانہ بنایا گیا ہے ۔

وہ چند ماہ قبل پشاور سے دوبارہ غائب ہو گئے تھے۔ انکے اہل خانہ کا الزام تھا کہ انہیں خفیہ ایجنسیوں کے اہلکاروں نےگھر کے ساتھ واقع ایک مسجد سے اٹھا لیا تھا۔اس سے قبل پشاور ہائی کورٹ نے انکی رہائی سے متعلق درخواست کو اس بنیاد پر خارج کر دیا تھا کہ لاپتہ افراد کے سلسلے میں سپریم کورٹ میں پہلے ہی سے ایک کیس زیر سماعت ہے، لہذا انکا نام بھی لاپتہ افراد کی فہرست میں شامل کردیا جائے۔