 | | | | | | | |||||||||||||||||||||||||||||||||||
| | ||||||||||||||||||||||||||||||||||||||||
|
لاپتہ احتجاج: پولیس اہلکاروں پر مقدمہ | ||||||||||||||||||||||||||||||||||||||||
راولپنڈی پولیس نے اپنے لاپتہ والد کی بازیابی کے لیے احتجاج کرنے والے لڑکے کو زدوکوب اور سرِ عام برہنہ کرنے پر برطرف کیے جانے والے پانچ پولیس اہلکاروں کے خلاف مقدمہ درج کر لیا ہے تاہم اب تک کوئی گرفتاری عمل میں نہیں آئی ہے۔ یہ مقدمہ راولپنڈی کے تھانہ سول لائنز میں پولیس آرڈیننس کے تحت درج کیا گیا ہے۔ ملزمان میں راولپنڈی پولیس کے برطرف سب انسپکٹر محمد شریف اور برطرف کانسٹیبلز وسیم خالد، نوید، فراز اور نثار شامل ہیں۔ لاپتہ افراد کے لواحقین نے گزشتہ برس 28 دسمبر کو راولپنڈی میں جی ایچ کیو کے قریب احتجاجی مظاہرہ کیا تھا جسے پولیس نے زبردستی منتشر کرنے کے لیے شرکاء کو زدوکوب کیا تھا اور اپنے لاپتہ والد مسعود جنجوعہ کی بازیابی کے لیے احتجاج کرنے والے سولہ سالہ محمد بن مسعود کی شلوار اتار دی تھی اور اسی حالت میں اٹھا کر انہیں پولیس کی گاڑی میں پھینک دیا تھا۔ بعد ازاں پولیس نے مظاہرین کے احتجاج پر محمد کو رہا کر دیا تھا۔ ان کے مطابق پولیس نے انہیں تشدد کا نشانہ بنایا تھا اور گالیاں بھی دیتے رہے تھے۔ اس واقعے کی تحقیقات کرنے والے ڈپٹی سپرنٹنڈنٹ آف پولیس راولپنڈی رانا شاہد نے بی بی سی سے بات کرتے ہوئے کہا کہ محکمانہ تحقیقات کے بعد پانچوں اہلکاروں کو ملازمت سے برطرف کر دیا گیا تھا اور اب ان کے خلاف مقدمہ درج کیا گیا ہے۔ اس سوال پر کہ اس واقعہ میں صرف نچلے درجے کے پولیس اہلکاروں کے خلاف ہی کارروائی کی گئی اور کیا ان کی سربراہی کرنے والے کسی اعلٰی پولیس افسر کے ملوث ہونے کے شواہد نہیں ملے تھے، انہوں نے کہا کہ جن اہلکاروں کی تصویر اخبار میں شائع ہوئی تھی ان کے خلاف کارروائی کی گئی تھی’باقی ان کی سربراہی کوئی بھی کررہا ہو وہ انہیں یہ تو نہیں کہے گا کہ تم ایسا کرو‘۔ دریں اثناء تھانہ سول لائنز کے ایس ایچ او اعجاز حسین نے کہا کہ’ کوئی ملزم ابھی گرفتار نہیں کیا گیا کیونکہ محکمے نے انہیں ملازمتوں سے فارغ کردیا تھا اور اس کے بعد وہ سب آگے پیچھے ہوگئے تھے‘۔ انہوں نے بتایا کہ ملزمان کا تعلق فیصل آباد،گوجرانوالہ، سیالکوٹ اور شیخوپورہ سے ہے اورگرفتاریوں کے لیے پولیس پارٹیاں بھیجی گئی ہیں۔ |  اسی بارے میں  لاپتہ افراد کے اہل خانہ سراپا احتجاج28 December, 2006 | پاکستان ’ ہر ماہ اذیت اور ہر سال موت‘26 December, 2006 | پاکستان ’بھائی آئی ایس آئی کے پاس ہے‘23 December, 2006 | پاکستان لاپتہ افراد کے لیے مظاہرہ09 December, 2006 | پاکستان لاہور کے عاطف گھر پہنچ گئے01 December, 2006 | پاکستان دو مزید ’لاپتہ‘ قوم پرست رہنما ظاہر04 November, 2006 | پاکستان پراسرار گمشدگیاں اور بے بسی23 November, 2006 | پاکستان جئے سندھ کے لاپتہ رہنما ’برآمد‘30 October, 2006 | پاکستان | ||||||||||||||||||||||||||||||||||||||||
| |||||||||||||||||||||||||||||||||||||||||
| |||||||||||||||||||||||||||||||||||||||||
