رفاقت علی بی بی سی اردو ڈاٹ کام، اسلام آباد

	لاپتہ افراد کا کیس سپریم کورٹ میں آنے سے 91 لاپتہ افراد کو ڈھونڈا جا چکا ہے (فائل فوٹو)

عاصمہ جہانگیر نے سپریم کورٹ کی دو رکنی بینچ کو بتایا ہے کہ عمران منیر جس کے بارے میں حکومت نےایک ہفتہ قبل تسلیم کیا تھا کہ ان کو غیر ملک کے لیے جاسوسی کے الزام میں گرفتار کیا گیا ہے، دراصل وہ آئی ایس آئی کے ایک اہلکار کے غضب کا نشانہ بنے ہوئے ہیں۔

عاصمہ جہانگیر نے کہا کہ عمران منیر کو جو ملائیشیا میں کاروبار کرتے تھے، اٹھائیس جولائی سن دو ہزار چھ کو اسلام آباد سے غائب کر دیا گیا اور جب اس کے والد نے ہائی کورٹ میں رٹ دائر کی تو وزارتِ دفاع نے کہا کہ وہ سرکاری ادارے کے پاس نہیں ہیں۔

سپریم کورٹ نے حکومت کو حکم جاری کیا کہ اتوار تک عمران منیر کے والد کی ان سے ملاقات کرائی جائے۔

سپریم کورٹ کو بتایا گیا کہ لاپتہ افراد کی تعداد 191 تھی تاہم جب سے سپریم کورٹ نے لاپتہ افراد سے متعلق مقدمہ شروع کیا ہے اس وقت سے اب تک 91 لوگوں کو ڈھونڈا جا چکا ہے جبکہ سو افراد کو ابھی تلاش کیا جا رہا ہے۔

عدالت نے ڈپٹی اٹارنی جنرل کو کہا کہ وہ ان تمام افراد کے بارے میں معلومات فراہم کریں جو حکومتی تحویل میں ہلاک ہو گئے ہیں۔

ڈپٹی اٹارنی جنرل طارق محمود کھوکھر نےعدالت کو بتایا کہ اٹامک انرجی کمیشن کے سینئرسائنٹیفک آفیسرعتیق الرحمن کا پتہ نہیں چل سکا ہے۔ عتیق الرحمن کے والدین کا کہنا ہے کہ عتیق الرحمٰن کو تین سال قبل ان کی شادی کے دن خفیہ ادراوں کے لوگوں نے غائب کر دیا۔

	لاپتہ افراد سے متعلق مقدمے کی سماعت دو ہفتوں کے لیے ملتوی کر دی گئی ہے (فائل فوٹو)

عدالت کو بتایا گیا کہ کراچی سے گیارہ سال سے قبل لاپتہ ہونے والے چونتیس افراد کے بارے میں بھی ایک درخواست دائر کئی گئی ہے۔ یہ درخواست ایم کیو ایم کے ان کارکنوں سے متعلق ہے جن کے بارے میں الزام لگایا جاتا ہے کہ’ کراچی آپریشن‘ کے دوران ان کو سرکاری اداروں نے تحویل میں لے کر ہلاک کر دیا تھا۔

گوانتاموبے میں دو سال تک قید رہنے والے سعود میمن کے بارے میں عدالت نے حکم جاری کیا کہ سعود میمن کی میڈیکل رپورٹ عدالت میں پیش کی جائے جس میں یہ بتایا جائے کہ سعود میمن کی موجودہ حالت کیسے ہوئی۔ سعود میمن کو پچھلی سماعت کے دوران سٹریچر پر عدالت میں پیش کیا گیا تھا۔

ایک اور لاپتہ فرد، عبید اللہ کی بیوی نے عدالت کو بتایا کہ ان کے شوہر کے ساتھ قید رہنے والے ایک شخص نے ان کو بتایا ہے کہ وہ ٹی بی میں مبتلا ہیں اور قریب المرگ ہیں۔ البتہ حکومت نے یہ تسلیم کرنے سے انکار کیا کہ عبیداللہ ان کی تحویل میں ہیں۔

لاپتہ افراد کے مقدمے کی سماعت دو ہفتوں کے لیے ملتوی کر دی گئی ہے اور اگلی سماعت پچیس مئی کو ہو گی۔