احمد رضا اسلام آباد

	تمام صوبوں سے شہریوں کے لاپتہ ہونے کی اطلاعات ہیں

وزارت داخلہ کے ترجمان بریگیڈئر ریٹائرڈ جاوید اقبال چیمہ نے منگل کو ایک بریفنگ میں بتایا کہ وفاقی حکومت نے چاروں صوبوں کے پولیس سربراہان اور سیکریٹری داخلہ کو ہدایت کی ہے کہ وہ ان لاپتہ افراد کو تلاش کریں جن کا مقدمہ سپریم کورٹ میں زیر سماعت ہے اور وزارت داخلہ کو 26 اپریل تک اس کی رپورٹ پیش کریں۔

لاپتہ افراد کے مقدمے کی آئندہ سماعت 27 اپریل کو ہونی ہے۔ سپریم کورٹ نے مقدمے کی گزشتہ سماعت پر اٹارنی جنرل پاکستان، داخلہ اور دفاع کے محکموں کے وفاقی سیکریٹریوں اور بریگیڈئر جاوید اقبال چیمہ کو جو وزارت داخلہ کے نیشنل کرائسس منجمینٹ سیل کے سربراہ بھی ہیں، آئندہ سماعت پر عدالت میں پیش ہونے اور لاپتہ افراد کے بارے میں مفصل رپورٹ پیش کرنے کا حکم دیا تھا۔

جب بریگیڈئر چیمہ سے دریافت کیا گیا کہ وزارت داخلہ اس سلسلے میں کیا کررہی ہے تو انہوں نے کہا کہ ’میں نے انسانی حقوق کمیشن پاکستان کو ایک خط لکھا ہے جس میں ان سے گذارش کی ہے کہ چونکہ یہ ایک انسانی حقوق کا مسئلہ ہے اور ہم ان لوگوں کو تلاش کرنے کے لیے ہر ممکن کوشش کریں گے تو وہ اس ہماری مدد کریں اور اس سلسلے میں ہمیں مزید معلومات فراہم کریں۔‘

باوجود اس کے کہ ہمارے پاس لوگوں کے پتے اور کوائف موجود نہیں ہیں ہم نے اس سلسلے میں کچھ پیش رفت کی ہے اس وقت میں اس کی تفصیل میں جانا نہیں چاہوں گا۔ انشاء اللہ جب 27 تاریخ کو ہم سپریم کورٹ میں جواب داخل کریں گے تو اس میں یہ ساری تفصیل بتادیں گے۔ بریگیڈیر جاوید اقبال چیمہ

انہوں نے پاکستان کے زیرانتظام کشمیر کے علاقے سے لاپتہ ہونے والے افراد اور جنوبی افریقہ سے پاکستان کے حوالے کیے گئے دہشتگردی کی شبہے میں زیرحراست پاکستانی شہری خالد محمود رشید کے بارے میں بات کرنے سے انکار کیا۔ انہوں نے حکومت کے اس موقف کو دہرایا کہ زیادہ تر افراد ذاتی وجوہ یا جہادی تنظیموں سے تعلق ہونے کی بناء پر کہیں چلے جاتے ہیں تو ان کے بارے میں یہ الزام لگادیا جاتا ہے کہ خفیہ ادارے انہیں اٹھاکر لے گئے ہیں۔

جب ان سے دریافت کیا گیا کہ لاپتہ ہونے کے بعد آزاد ہونے والے بعض افراد نے عدالتوں میں حلف نامے جمع کرائے ہیں جن میں انہوں نے دوسرے لاپتہ افراد کی نشاندہی کی ہے جو ان کے ساتھ خفیہ اداروں کی حراست میں تھے تو کیا وزارت داخلہ ان افراد سے بھی کوئی مدد حاصل کرے گی، تو انہوں نے جواب دیا کہ ’اگر اس سلسلے میں ہمیں کسی نے ایسا کوئی حلف نامہ دیا یا اس طرح کی کوئی بات چیت کی تو ہم اس پر بھی غور کریں گے۔‘

انہوں نے کہا کہ سپریم کورٹ ملک کی اعلی ترین عدالت ہے اور وہ اس سلسلے میں جو بھی معلومات مانگے گی ہم فراہم کریں گے۔

واضح رہے کہ لاپتہ افراد کے مقدمے کی گزشتہ سماعت کے موقع پر ڈپٹی اٹارنی جنرل پاکستان راجہ ارشاد نے مقدمے میں حکومت کی پیروی کرنے سے یہ کہہ کر معذوری ظاہر کردی تھی کہ وزارت داخلہ اس بارے میں معلومات فراہم کرنے میں ان سے کوئی تعاون نہیں کررہی اس لیے وہ عدالت کی مدد کرنے سے قاصر ہیں۔