عزیزاللہ خان بی بی سی اردو ڈاٹ کام کوئٹہ

	علامتی بھوک ہڑتال بلوچستان نیشنل پارٹی نے کی تھی

علامتی بھوک ہڑتال کا کیمپ کوئٹہ پریس کلب کے سامنے لگایا گیا ہے جس میں جماعت کے مقامی اور مرکزی رہنما موجود تھے۔

جماعت کے مرکزی رہنما آغاحسن ایڈووکیٹ نے بتایا کہ ان کی جماعت کے لیے تمام جمہوری راستے بند کر دیے گئے ہیں اور جیل میں ان کی جماعت کے رہنما کو ایک ہفتہ قبل زہر دینے کی کوشش کی گئی ہے۔

انہوں نے کہا کہ ضلعی انتظامیہ نے انہیں کیمپ لگانے سے منع کیا تھا لیکن جمہوری احتجاج ان کا حق ہے۔

اس کے علاوہ بلوچ سٹوڈنٹس آرگنائزیشن نے پریس کلب کے سامنے احتجاجی مظاہرہ کیا ہے اور حکومت کے خلاف شدید نعرہ بازی کی ہے۔

بلوچ بار ایسوسی ایشن کے رہنما صادق رئیسانی ایڈووکیٹ نے اخباری کانفرنس میں سردار اختر مینگل کے ساتھ جیل میں روا رکھے گئے سلوک کی مذمت کی ہے۔

ادھر گزشتہ رات تربت اور پسنی میں دھماکے ہوئے ہیں لیکن کوئی نقصان نہیں ہوا۔

ان دھماکوں کی ذمہ داری نا معلوم شخص دودا بلوچ نے ٹیلیفون پر بلوچ لبریشن فرنٹ کی جانب سے قبول کی ہے ۔ اس کے علاوہ اپنے آپ کو بلوچ لبریشن آرمی کا ترجمان ظاہر کرنے والے بیبرگ بلوچ نامی شخص نے ٹیلیفون پر بتایا کہ دو روز پہلے بھمبھور ٹاپ کے پاس سیکیورٹی فورسز پر حملہ کیا گیا جبکہ فورسز نے کاہان کے قریبی علاقوں پر حملے کیے ہیں جن میں جانی نقصان ہوا ہے لیکن سرکاری سطح پر ان حملوں کی کوئی تصدیق نہیں ہو سکی۔