عزیزاللہ خان بی بی سی اردو ڈاٹ کام کوئٹہ

	بلوچستان میں سکیورٹی کارروائیوں سے پہلے بھی سکیورٹی اہلکاروں کو نشانہ بنایا جاتا رہا ہے

کاہان سے آمدہ اطلاعات کے مطابق سکیورٹی فورسز کی ایک گاڑی دھماکہ خیز مواد سے ٹکرائی ہے جس میں سوار اہلکار ہلاک اور زخمی ہوئے ہیں۔ ایسی اطلاعات موصول ہوئی ہیں کہ کم سے کم دو اہلکار ہلاک اور چار زخمی ہوئے ہیں۔

دریں اثنا اپنے آپ کو کالعدم تنظیم بلوچ لبریشن آرمی کا ترجمان ظاہر کرنے والے بیبرگ بلوچ نامی شخص نے ٹیلیفون پر کہا ہے کہ سکیورٹی فورسز کی تین گاڑیاں جا رہی تھیں جن میں سے ایک کو دھماکے سے اڑایا گیا ہے جس کے بعد فائرنگ کا تبادلہ ہوا ہے۔

بیبرگ بلوچ نے دعوی کیا ہے کہ اس واقعے کے بعد سکیورٹی فورسز نے علاقے میں کوہ دلبند، جوہان، سپرنجی اور تری کے مقامات پر فضائی حملے کیے ہیں لیکن مسلح قبائلیوں کا کوئی نقصان نہیں ہوا۔

سرکاری سطح پر ان دعووں کی تصدیق نہیں ہو سکی۔ بلوچستان حکومت کے ترجمان رازق بگٹی سے رابطہ کیا تو انہوں نے اس بارے میں لاعلمی کا اظہار کیا ہے۔

اس کے علاوہ بلوچ سٹوڈنٹس آرگنائزیشن کے رہنما محی الدین نے کہا ہے کہ تربت سے ان کے ایک کارکن کو خفیہ ایجنسی کے اہلکاروں نے اٹھایا ہے جبکہ گزشتہ روز جمہوری وطن پارٹی کے ایک اور رہنما عبیداللہ عمرانی لاپتہ ہوئے ہیں۔

تین روز پہلے جمہوری وطن پارٹی کے رہنما رفیق کھوسو کے بھائی نے دعوی کیا تھا کہ رفیق کھوسو کو خفیہ ایجنسی کے اہلکار اٹھا کر لے گئے ہیں۔