عزیزاللہ خان بی بی سی اردو ڈاٹ کام کوئٹہ

’بلوچستان میں دور دراز علاقوں میں طبی سہولیات کم ہیں‘

پاکستان میں خواتین کی صحت کے مسائل کے بارے میں پچھتر ملین ڈالر سے ایک منصوبہ شروع کیا گیا ہے جس کے تحت ملک کے بیس اضلاع میں خواتین کو صحت کی بہتر سہولیات فراہم کی جائیں گی۔ بلوچستان کے چار اضلاع اس منصوبے میں شامل نہیں۔

جمعرات کو کوئٹہ میں ایک سیمینار میں بڑی تعداد میں ڈاکٹر اور ماہرین موجود تھے جو خواتین کی بیماریوں کے حوالے سے اپنے اپنے مقالے پیش کر رہے تھے۔ اس منصوبے کی ڈائریکٹر شاہین مسعود نے بی بی سی کو بتایا ہے کہ پاکستان میں ہر بیس منٹ بعد ایک خاتون زچگی سے متعلقہ بیماری سے ہلاک ہو جاتی ہے۔

پاکستان میں زچگی کی وجہ سے شرح اموات ایک لاکھ میں ساڑھے تین سو ہے جبکہ بلوچستان میں یہ شرح چار سو سے سات سو تک ہے جو کہ ایک اندازے کے مطابق ایشیا میں سب سے زیادہ ہے۔

ماہرین نے بتایا ہے کہ بلوچستان میں کوئٹہ کے بعد دوسرے بڑے شہرخضدار میں یہ شرح سات سو تک ہے تو دیگر دور دراز اور پسماندہ علاقوں کی کیا صورتحال ہو گی۔

زنانہ امراض کی پروفیسر ڈاکٹر نائلہ احسان نے بتایا ہے کہ بلوچستان میں دور دراز آبادیاں ہیں جہاں نہ سڑکیں ہیں اور نہ بجلی ہے۔ اس کے علاوہ تعلیم کا فقدان ہے اور غربت حد سے زیادہ ہے۔

ان علاقوں میں رہنے والے لوگ بنیادی مرکز صحت تک پہنچ ہی نہیں پاتے اور اگر پہنچ جائیں تو ان مراکز میں سہولیات نہیں ہوتیں۔ یہاں اسی فیصد خواتین گھروں میں زچگی کے کیسز کراتی ہیں۔