عزیزاللہ خان بی بی سی اردو ڈاٹ کام کوئٹہ

گزشتہ ہفتے کوئٹہ میں ایک دھماکے میں گیارہ افراد ہلاک ہو گئے تھے

یہ دھماکہ دو بجے کے لگ بھگ ہوا اور اس کی آواز اس قدر شدید تھی کہ دور دور تک سنی گئی ہے۔ پولیس ذرائع نے بتایا ہے کہ دھماکہ عمارت میں ایک بیت الخلاء میں ہوا ہے جس سے عمارت میں کئی شیشے ٹوٹ گئے ہیں۔

کوئٹہ شہر کے پولیس افسر پرویز رفیع بھٹی نے کہا ہے کہ پولیس دھماکے کی وجوہات معلوم کرنے کی کوشش کر رہی ہے اور بم ڈسپوزل سکواڈ کا عملہ جائے وقوعہ کی تلاشی لے رہا ہے۔ایک اور پولیس افسر نے بتایا ہے کہ یہ بم دھماکہ ہے۔

جس بیت الخلاء میں دھماکہ ہوا ہے یہ وزراء کے بلاک میں تیسری منزل پر واقع ہے۔ دھماکے کے وقت کوئی وزیر موجود نہیں تھا صرف ملازمین موجو د تھے جو دھماکے کے بعد عمارت سے فورا باہر نکل آئے۔ اس دھماکے سے سیکرٹیریٹ میں خوف کی فضا پائی جاتی ہے۔

یاد رہے گزشتہ جمعہ کو شہر کے وسطی علاقے میزان چوک میں دھماکہ ہوا تھا جس میں دو فوجی اہلکاروں سمیت گیارہ افراد ہلاک ہو گئے تھے جس کے بعد شہر میں سخت حفاظتی اقدامات کیے گئے تھے۔ لیکن اس کے باوجود جوائنٹ روڈ پر نامعلوم افراد نے دو راکٹ نصب کر دیے تھے جنھیں پولیس نے ناکارہ بنا دیا تھا اور اب سول سیکریٹریٹ میں دھماکہ حکومتی کوششوں پر ایک سوالیہ نشان ہے۔