رفعت اللہ اورکزئی بی بی سی اردو ڈاٹ کام، پشاور

	مقامی لوگوں کا کہنا ہے کہ جھڑپوں میں وانا سکاؤٹس کے تین اہلکار بھی ہلاک ہوئے ہیں

جنوبی وزیرستان کے پولیٹکل ایجنٹ حسین زادہ خان نے صدر مقام وانا سے ٹیلی فون پر بی بی سی کو بتایا کہ تازہ جھڑپیں بدھ کی صبح مقامی جنگجوؤں کے سربراہ مولوی نذیر کے حامیوں اور قبائلی لشکر کی طرف سے وانا کے علاقوں شین ورسک اور ژہ غنڈی میں غیر ملکیوں کے مورچوں پر حملوں کے بعد شروع ہوئی۔

حسین زادہ خان کے مطابق تاحال اڑتالیس افراد کی ہلاکت کی تصدیق ہوچکی ہے۔ انہوں نے کہا کہ وانا کے مغرب میں ژہ غنڈی کے علاقے میں پچیس جبکہ شین ورسک میں انیس غیر ملکی مارے گئے ہیں جبکہ جوابی حملے میں مولوی نذیر کے چار حامی بھی ہلاک اور نو زخمی ہوئےہیں۔

مقامی لوگوں کا کہنا ہے کہ جھڑپوں میں وانا سکاؤٹس کے تین سپاہیوں کے علاوہ ایک فوجی اہلکار بھی مارا گیا ہے تاہم سرکاری طورپر اس سلسلے میں ابھی تک کچھ نہیں کہا گیا۔

لشکر نے شین ورسک اور ژہ غنڈی کے علاقوں میں غیر ملکیوں کے مورچوں پر بھاری ہتھیاروں سے حملے کیے جس کے چند گھنٹوں بعد لڑائی کلوشہ اور اعظم ورسک کے علاقوں تک پھیل گئی

مقامی ذرائع کے مطابق بدھ کی صبح لشکر نے کاروائی کرتے ہوئے شین ورسک اور ژہ غنڈی کے علاقوں میں غیر ملکیوں کے مورچوں پر بھاری ہتھیاروں سے حملے کیے جس کے چند گھنٹوں بعد لڑائی کلوشہ اور اعظم ورسک کے علاقوں تک پھیل گئی ۔ سرکاری ذرائع کا کہنا ہے کہ لڑائی میں فریقین کی جانب سے بھاری ہتھیاروں کا استعمال کیا جارہا ہے۔

ادھر مولوی نذیر کے حامیوں نے وانا کے علاقے ژہ غنڈی پرقبضے کرنے اور چالیس غیر ملکیوں کو گرفتار کا دعوی کیا ہے تاہم آزاد ذرائع سے اس بات کی تصدیق نہیں ہوسکی۔
آ
خری اطلاعات آنے تک قبائل اور غیر ملکیوں کے درمیان مابین کلوشہ ، ژہ غنڈی، اعظم ورسک اور سین ورسک کے علاقوں میں شدید لڑائی جاری تھی۔

واضح رہے کہ قبائل اور غیر ملکیوں کے مابین انیس مارچ سے شروع ہونے والی اس لڑائی میں اب تک ڈھائی سو کے قریب افراد ہلاک ہوچکے ہیں۔ مقامی جنگجوؤں کے سربراہ مولوی نذیر نے ان غیرملکیوں کو غیر مسلح اور علاقہ بدر کرنے تک جنگ جاری رکھنے کا اعلان کر رکھا ہے