ہارون رشید بی بی سی اردو ڈاٹ کام، پشاور

	ٹانک میں جمعہ کو تیسرے روز بھی کرفیو جاری رہا (فائل فوٹو)

ادھر ٹانک سے اغوا کیے گئے ایک سکول کے پرنسپل اور ان کے بھائی کو مقامی شدت پسندوں نے ہفتے کے روز رہا کرنے کا وعدہ کیا ہے۔ یہ اعلان شدت پسندوں نے میران شاہ میں محسود قوم کے ایک اٹھارہ رکنی وفد سے ملاقات میں کیا۔

پشاور میں جاری کیے گئے ایک سرکاری بیان کے مطابق منگل کی رات ٹانک میں بینک لوٹنے والوں اور سرکاری املاک کو نذر آتش کرنے والوں کے خلاف مقدمات درج کر لیے گئے ہیں۔

ٹانک میں جمعہ کو تیسرے روز بھی کرفیو جاری رہا تاہم نماز جمعہ اور خرید و فروخت کے لیے ایک سے تین بجے تک کرفیو میں نرمی کی گئی۔

ڈی آئی جی ٹانک ذوالفقار احمد چیمہ نے ایک بریفنگ میں لوگوں سے کہا ہے کہ وہ اپنا اسلحہ غیرمشروط طور پر حکام کے حوالے کر دیں ورنہ ان کے خلاف کارروائی کی جائے گی۔

قانون نافذ کرنے والے اداروں نے ٹانک میں داخل ہونے والے تمام راستوں پر مستقل چوکیاں قائم کرکے سکیورٹی حصار کو مزید مضبوط کر دیا ہے۔

ادھر جعمیت علماء اسلام کے سینیٹر محمد صالح شاہ نے بی بی سی سے بات کرتے ہوئے حکومت سے کرفیو ختم کرنے کا مطالبہ کیا ہے۔ ان کا کہنا تھا کہ اس سے عام لوگوں کے لیئے مسائل پیدا ہو رہے ہیں جس کی وجہ سے خدشہ ہے کہ ان کی ہمدردیاں شدت پسندوں کے ساتھ ہو جائیں گی۔

جعمیت علماء اسلام کے جنوبی وزیرستان میں سیکرٹری اطلاعات نیاز احمد قریشی نے، جو شدت پسندوں سے پرنسپل کی رہائی کے لیے ملنے والے جرگے میں شامل تھے، بتایا کہ یہ رہائی غیرمشروط ہوگی۔

تاہم شدت پسندوں نے ان پر واضع کیا کہ آکسفورڈ پبلک سکول کے فرید اللہ نے حکومت اور ان کے درمیان غلط فہمی پیدا کرنے کی کوشش کی جس کی وجہ سے ٹانک کے حالات خراب ہوئے۔ شدت پسندوں نے فریداللہ کو اپنا مجرم قرار دیا تاہم جرگے کی درخواست پر ان کی غیرمشروط رہائی پر آمادہ ہوگئے۔