مسعود عالم بی بی سی اردو ڈاٹ کام، اسلام آباد

	کیا اس بندھن کی کامیابی کا راز صرف یہ امکان ہے کہ اگر ایک طرف کی لڑکی کے ساتھ زیادتی ہوئی تو اس کا بدلہ دوسری لڑکی سے لیا جائے گا؟

ایک ساتھ سات طلاقیں

وٹہ سٹہ، طلاق اور نکاح پر نکاح

لیکن حال ہی میں پاکستان کے دیہی علاقوں میں کی گئی ایک تحقیق سے یہ نتیجہ نکالا گیا ہے کہ وٹے سٹے کی شادی، مخصوص حالات میں خواتین کے لیے فائدہ مند ثابت ہوتی ہے۔

بدلے کی شادی میں، جسے وٹہ سٹہ بھی کہا جاتا ہے، جس خاندان میں اپنی لڑکی بیاہی جاتی ہے اسی گھر کی لڑکی سے اپنے بیٹے کا رشتہ جوڑا جاتا ہے۔ یہ رواج پاکستان کے علاوہ جنوبی بھارت، چین اور مغربی افریقہ کے کئی ممالک میں عام ہے۔ لیکن پاکستان کے دیہی علاقوں میں ہونے والی ہر تین شادیوں میں سے ایک وٹہ سٹہ کے تحت ہوتی ہے۔

’فائدہ مند رواج‘  اس تحقیق سے یہ تو ثابت نہیں ہوتا کہ وٹہ سٹہ خوشگوار ازدواجی زندگی گزارنے کا بہترین نسخہ ہے، لیکن پاکستان کے دیہی علاقوں میں جب تک معاش، تعلیم اور عورتوں کے مساوی حقوق سے متعلق آگاہی نہیں ہوتی، تب تک شادی شدہ عورتوں کے تحفظ کے لیے، اس تحقیق کے مطابق، وٹہ سٹہ ایک فائدہ مند رواج ہے۔

عالمی بینک کے لیے کی گئی اس تحقیق میں شادی کی ناکامی کو جانچنے کے لیے علیحدگی، خاندانی تشدد اور بیوی کی ذہنی صحت کو معیار بنایا گیا ہے۔ اور ان تینوں عوامل کے حوالے سے وٹے سٹے کی شادیاں عام شادیوں سے زیادہ کامیاب ثابت ہو رہی ہیں، کہ ان میں علیحدگی کا امکان روایتی شادیوں کے مقابلے میں پینسٹھ فیصد کم ہے، گھریلو تشدد چھیالیس فیصد کم، اور ڈیپریشن اور دوسرے ذہنی امراض چھپن فیصد کم دیکھنے میں آئے۔

کیا اس کامیابی کا راز صرف یہ امکان ہے کہ اگر ایک طرف کی لڑکی کے ساتھ زیادتی ہوئی تو اس کا بدلہ دوسری طرف کی لڑکی سے لیا جائے گا؟ ورلڈ بینک کی اس رپورٹ کی مصنفہ غزالہ منصوری کے مطابق یہ واحد تو نہیں لیکن ایک اہم سبب ہے۔

زیادتی کے بدلے زیادتی کا یہی فلسفہ جو دونوں جانب کی عورتوں کے لیے تحفظ فراہم کرتا ہے، اگر الٹا پڑ جائے تو عورتوں پر تشدد کو بڑھاوا دینے کا سبب بھی بن جاتا ہے، کیونکہ دونوں طرف سے پٹنا تو عورت کو ہی ہے۔ تو پھر وٹہ سٹہ کے فائدے زیادہ یا نقصان؟ رپورٹ کے مطابق جن معاشروں میں عورت اور مرد کا رشتہ استحصال پر مبنی ہے وہاں وٹہ سٹہ کے فائدے زیادہ اور نقصان کم ہیں۔

اس تحقیق سے یہ تو ثابت نہیں ہوتا کہ وٹہ سٹہ خوشگوار ازدواجی زندگی گزارنے کا بہترین نسخہ ہے، لیکن پاکستان کے دیہی علاقوں میں جب تک معاش، تعلیم اور عورتوں کے مساوی حقوق سے متعلق آگاہی نہیں ہوتی، تب تک شادی شدہ عورتوں کے تحفظ کے لیے، اس تحقیق کے مطابق، وٹہ سٹہ ایک فائدہ مند رواج ہے۔