ندیم سعید بی بی سی اردو ڈاٹ کام، ملتان

	ملزم حسن نے پہلے فائرنگ کر کے آمنہ اور اس کے بھائی کو زخمی کیا۔

تین بچوں کی ماں آمنہ اپنے دعوے کے سلسلے میں عدالت سے پیشی بھگتا کر اپنے بھائی اکبر کے ساتھ سائیکل پر گھر واپس آرہی تھی کہ گاؤں یارو کھوسہ کے قریب اس کے دیور حسن نے ان پر فائرنگ کردی جس پر دونوں زخمی ہوکرگر پڑے۔ حملہ آور نے بعد میں زخمی آمنہ کا ناک اور دونوں ہونٹ استرے کی مدد سے کاٹ کر پھینک دیئے اور موقع سے فرار ہوگیا۔

زخمی آمنہ نے اس بری حالت میں بھی زمین سے اپنے کٹے ہوئے اعضاء ڈھونڈ کر غالباً اس امید پر دوپٹے میں باندھ لیے کہ شاید یہ دوبارہ جوڑ جائیں گے۔ تین روز گزرنے کے بعد وہ اب بھی اس کے پاس ایک پوٹلی میں رکھے ہوئے تھے۔وہ ہسپتال تک انہیں برف میں رکھ کر لائی تھی۔

’ناک کاٹنے کا مقصد ذلیل کرنا ہوتا ہے تاکہ وہ (جس کا ناک کاٹا گیا ہو) کسی کو شکل دکھانے کے قابل نہ رہے‘، محمد یوسف کھوسہ نے بتایا جو کہ ڈیرہ غازی خان کے ضلعی ہیڈ کوارٹر ہسپتال کے سرجیکل وارڈ میں داخل ایسے ہی ظلم کا شکار اپنی بھتیجی آمنہ کی تیمار داری کے لیے آئے ہوئے تھے۔

لیکن آمنہ کو ابتدائی طبی امداد دینے والے ڈاکٹر خالد وحید کا کہنا ہے کہ یہ بے جان ٹکڑے اب کسی کام کے نہیں۔ ان کا کہنا تھا کہ ناک کاٹنے والے واقعات وقتاً فوقتاً ہوتے رہتے ہیں اور متاثرہ افراد میں عموماً خواتین ہوتی ہیں۔انہوں نے بتایا کہ ڈیرہ غازی خان میں پلاسٹک سرجری کی سہولت نہ ہونے کے باعث متاثرہ افراد کو باقی زندگی اسی طرح بغیر ناک اور ہونٹوں کے گزارنا پڑتی ہے۔

تو کیا آمنہ کو اس ظلم کا شکار صرف اس لیئے ہونا پڑا کہ اس نے طلاق مانگی تھی ؟ تحقیق کرنے پر معلوم ہوا کہ معاملہ اتنا سادہ بھی نہیں۔

محمد یوسف کے مطابق آمنہ کی شادی آٹھ سال قبل اپنے ہی قبیلے کہ ایک شخص عباس سے ہوئی تھی۔ دونوں خاندانوں نے یہ شادی ’وٹہ سٹہ‘ یعنی رشتے کے بدلے رشتہ کے رواج کے تحت طے کی تھی۔ آمنہ کے بدلے میں اس کی نند ہانی مائی کی شادی اس کے بھائی یاسین سے ہوئی تھی۔جبکہ آمنہ کی بہن ہاجرہ کی شادی (ملزم) حسن سے ہوئی تھی اور اس کے بدلے آمنہ کے بھائی مصطفیٰ سے اس کی ایک اور نند کی شادی ہونا تھی۔ تا ہم مصطفیٰ شادی سے پہلے ہی انتقال کر گیا اور یوں دوسری جانب ایک رشتے کا ’ادھار‘ باقی تھا۔

آمنہ کی نند اور بھابھی ہانی کے ہاں شادی کے سات برس تک کوئی اولاد نہ ہوئی اور چند ماہ قبل اس نے اپنے سسر کے خلاف زیادتی کی کوشش کرنے کے الزام کے تحت مقدمہ درج کرایا اور اپنے میکے جا کر رہنا شروع کردیا۔

ایک تو دوسرے فریق نے پہلے ہی ایک رشتے کا قرض چکانا تھا اوپر سے وٹے سٹے میں آئی ہانی بھی ناراض ہوکر میکے بیٹھ گئی۔ جوابی کاروائی کے طور پر آمنہ کو اس کے والدین نے اپنے گھر بٹھا لیا اور بعد میں تنسیخ نکاح کا دعویٰ بھی کردیا گیا۔

آمنہ کی بہن ہاجرہ ابھی بھی اپنے سسرال میں ہے جبکہ اس کا شوہر حسن واردات کرکے قبائلی علاقے میں روپوش بتایا جارہا ہے۔ جبکہ آمنہ کے بھائی اکبر کی دونوں ٹانگیں حسن کی فائرنگ سے ٹوٹ گئی ہیں۔ محمد یوسف کے مطابق ٹانگوں پر فائرنگ کرنے کا مقصد اکبر کو طلاق کے مقدمے کی پیروی کے لیے عدالت کی طرف آنے جانے سے روکنا تھا۔

آمنہ کے دو بچے اس کے اپنے پاس جبکہ ایک اس کے شوہر کے پاس ہے۔