عصمت جبین اسلام آباد

	یہ ملک میں بننے والا پہلا انٹرنیٹ کیفے ہے جو نابیناؤں کے لیے بنا ہے

اسی کے پیشِ نظر یہ بات اُمید کی کرن سے کم نہیں کہ ملک کے پہلے بصارت سے محروم افراد کے لیے انٹرنیٹ کیفے کا اسلام آباد میں افتتاح ہوگیا ہے۔

اس اچھوتے کیفے کا قیام ملک میں بینائی سے محروم افراد کے لیے کام کرنے والی تنظیم پاکستان فاؤنڈیشن فائٹنگ بلائنڈنیس( PFFB) اور ورلڈ بینک کی مدد سے ممکن ہوا۔

فاؤنڈیشن کی چیئر پرسن ڈاکٹر سلمٰی مقبول نے، جوکہ خود بھی بصارت سے محروم ہیں بی بی سی کو بتایا کہ اس انفارمیشن ٹیکنالوجی ہیلپ لائن پراجیکٹ کی بدولت نہ صرف بصارت رکھنے والے اور بصارت سے محروم افراد کے درمیان تکینیکی فاصلے کو ختم کرنے میں مدد ملے گی۔ بلکہ نابینا شہریوں کو قومی زندگی کے دھارے میں برابری کے درجے کا حصول بھی ممکن ہوگا۔

	انٹرنیٹ کیفے دن میں تین گھنٹے کھلتا ہے

انٹرنیٹ کیفے میں پانچ ایسے کمپیوٹرز رکھے گئے ہیں جن میں جاز (JAWS) نامی خصوصی سافٹ وئیر ڈالا گیا ہے جو نابینا افراد کی مختلف آوازوں کی مدد سے انٹرنیٹ سرفنگ میں معاونت کرے گا۔ یہ تمام کمپیوٹرز برق رفتار (DSL) کنکشن سے چلیں گے جن سے انٹرنیٹ سرفنگ میں سہولت ہوگی۔

ڈاکٹر سلمٰی نے کہا کہ ٹیکنالوجی انسانوں کو برابری حاصل کرنے میں مدد دیتی ہے اور اس خصوصی انٹرنیٹ کیفے کی بدولت بصارت سے محروم افراد جدید ترقی کے سب سے بڑے خزانے یعنی انٹرنیٹ تک رسائی حاصل کرسکیں گے جس سے اُن کی علمی محرومیوں کا ازالہ ممکن ہوگا۔

	نابینا افراد کو مختلف آوازوں کی مدد سے انٹرنیٹ سرفنگ میں معاونت ملے گی

محمد عاطف شیخ نے جوکہ تنظیم سپیشل ٹیلنٹ ایکسچینج پروگرام (STEP) کے پریذیڈنٹ ہیں، انٹرنیٹ کیفے کے قیام کو خوش آئند قرار دیا لیکن اُنہوں نے یہ بھی کہا کہ یہ کام بہت دیر سے شروع ہواہے اور اُس کی وجہ یہ ہے کہ ’ہم صلاحیتوں کو صحیح طور پر استعمال نہیں کرتے۔ اگر صلاحیتوں کو صحیح طور پر بروئے کار لایاجاتا تو یہ کام بہت پہلے ہوسکتا تھا۔ وہ خود نا صرف بہت پہلے سے اس سافٹ وئیر کے بارے میں جانتے ہیں بلکہ اُن کی تنظیم بصارت سے محروم افراد کو بھی کافی عرصے سے اس سے متعارف کروا رہی ہے‘۔

اُنہوں نے بتایاکہ پاکستان کی پہلی ویب سائٹ pk.org.step ہے جو بصارت سے محروم افراد کے لیے سو فیصد معاون ہے۔ اس کا ہر حصہ بصارت سے محروم افراد جاز سافٹ وئیر کی مدد سے سن سکتے ہیں۔

دکھائی دیتا ہے کہ بصارت سے محروم افراد اس انٹرنیٹ کیفے کے ذریعے بصیرت حاصل کریں گے اور یوں ٹیکنالوجی کے حصول کے ذریعے اہلِ بصارت کی فوقیت کو زائل کرسکیں گے۔