دلاور خان وزیر بی بی سی اردو سروس، ڈیرہ اسماعیل خان

	وزیستان میں انتہائی سکیورٹی کے باوجود شدت پسند کارروائیاں ہوتی رہتی ہیں

اطلاعات کے مطابق بدھ کی شام آٹھ بجے کے قریب ایک سفید موٹرکار میں سوار نامعلوم نقاب پوشوں نے پولٹیکل محرر گل ذادہ کی گاڑی پر فائرنگ کردی جس کے نتیجہ میں گل ذادہ، ایک خاصہ دار فورس کے صوبیدار گلی خان اور ان کا ایک تیسرا ساتھی موقعہ پر ہی ہلاک جبکہ دیگر دو شدید زخمی ہو گئے۔ زخمیوں کو آرمی کے ہسپتال میں داخل کرا دیا گیا ہے۔

گل ذادہ پر حملہ اس وقت ہوا جب وہ کچہری سے اپنی ذاتی گاڑی میں گھر لوٹ رہے تھے۔ نامعلوم نقاب پوش فرار ہونے میں کامیاب ہوگیئے۔

	وزیرستان کے قریب کئی دیہات ایسے ہیں جہاں افغانستان میں لڑائی لڑنے والوں کی قبریں موجود ہیں اور لوگ انہیں جہادی کہتے ہیں

ایک اور اطلاع کے مطابق سرحد پار افعانستان کے صوبہ پکتیا سے پانچ لاشیں میران شاہ کے گاؤں دیگان لائی گئی ہیں اور میران شاہ کے دو مختلف دیہات میں انہیں سپرد خاک کردیا گیا ہے۔ لاشوں میں میران شاہ کے مقامی کمانڈر مولانا کلام کی لاش بھی شامل ہے۔

افغانستان میں طالبان حکومت کے خاتمے بعد سے لے کر اب تک سکیورٹی فورسز اور طالبان کے حامی قبائل کے درمیان جھڑپوں میں وزیرستان میں سینکڑوں افراد ہلاک ہو چکے ہیں۔

حال ہی میں وزیرستان میں امن کی بحالی کے لیئے حکومت اور وہاں کے کئی قبائل میں امن معاہدہ بھی ہوا ہے جسے دونوں طرف سے کافی سراہا گیا ہے۔